https://www.facebook.com/bgllacin
La Banda Gaites Llacín Asturies va llanzar un trabayu nuevu dempués de 17 años 
El xueves que vien a les 20h estrenamos na nuestra canal de YouTube’l single de ‘Resollu’, álbum que va ver la lluz en CD y en vinilu’l 27 de xunu. Spotify
Diecisiete años dempués, la Banda Gaites Llacín torna con un trabayu discográficu nuevu: Resollu. Como anunció la propia agrupación a traviés de les sos redes sociales, el so tercer discu va ver la lluz el 27 de xunu y el 4 de xunetu van «presentalu en directo nun conciertu mui especial en Llanes«. Amás, van editar l’álbum en CD y en vinilu, siendo’l primer trabayu rellacionáu cola gaita que s’asoleya nesti formatu dempués de delles décades. El vienres que vien va poder sentise’l primer adelantu en toles plataformes musicales, pero un día enantes, a les 20h, Musicasturiana.com va estrenalu na so canal de YouTube.
La Banda Gaites Llacín surdió en 1998 nel conceyu Llanes pente los escolinos de la Escuela de Música Tradicional. Ye una de les más destacaes del país, con dos discos yá publicaos; xires per países como China o Estaos Xuníos; actuaciones nos principales festivales del xéneru y dellos reconocimientos y premios. Dende los sos anicios l’agrupación ta dirixida por Vítor Carbajal y Nuria Tarodo, y foi medrando a lo llargo’l tiempu de los 28 hasta los 65 componentes, convirtiéndose asina nuna de les bandes más numberoses d’Asturies.
El repertoriu qu’executa fai un viaxe pel patrimoniu musical asturianu dende los vieyos temes tradicionales a los más actuales, pasando per composiciones propies, y en delles ocasiones fai fusiones musicales con pieces de los paises que formen l’Arcu Atlánticu. Nel so tercer discu, Resollu, van afondar nesti llabor qu’abrieron discográficamente con Tornallás (2002) y Xideces (2008).
