El Gobiernu d’Asturies impulsa la Zona Diversa Festival‘, un eventu pa visibilizar la diversidá y l’igualdá na cultura, nuna redolada accesible. El director xeneral de l’Axenda 2030, Juan Ponte, destaca la importancia d’esta iniciativa na promoción de la participación social y l’accesibilidá universal. L’eventu va tener llugar el vienres a les 19:00 hores na plaza del Paragües d’Uviéu y va cuntar con sistema de llinguaxe de signos y baños afechos.
La Dirección Xeneral de l’Axenda 2030 de la Conseyería d’Ordenación del Territoriu, Urbanismu, Vivienda, impulsa Zona Diversa Festival, un eventu destináu a visibilizar la diversidá y l’igualdá y favorecer la participación social nel ámbitu de la cultura, nuna redolada integradora y accesible.
El director xeneral de l’Axenda 2030, Juan Ponte, presentó güei la iniciativa, que se va celebrar el próximu vienres na plaza del Paragües d’Uviéu, y va amosar el trabayu de diversos colectivos al traviés d’actuaciones y ritmos nun espaciu que va cuntar con llinguaxe de signos y baños afechos para garantizar l’accesibilidá.
“Enfocamos Zona Diversa al traviés del derechu a la cultura y la promoción de la participación social y l’accesibilidá universal en toles situaciones», destacó Ponte, quien resaltó que con esta actividá tamién se tienen en cuenta otra serie d’Oxetivos de Desenvolvimientu Sostenible (ODS) como la promoción de la salú, el bienestar, la educación, la igualdá de xéneru o’l trabayu decente.
El director destacó «el deber» de toles instancies sociales na promoción de l’accesibilidá universal» por que cualquier persona pueda llevar la vida que llibremente escueya. Nesti sentíu, esplicó, «les discapacidáes nun son fallos, sinón elementos pervalibles de diversidá».
Para Ponte, los derechos de les persones que viven en situaciones de discapacidá, non yá tienen d’enunciase, sinón que tienen de materializase», lo qu’esixe, tamién, «reconstruyir l’espaciu de la vida cotidiana, tantu l’espaciu públicu como l’espaciu priváu, porque polo xeneral son les redolaes los que capaciten o discapaciten”.
“L’oxetivu de la Dirección Xeneral d’Axenda 2030 parte del postuláu de que naide ye más que naide y que, por tanto, naide puede quedar tras» resaltó.
Nel actu tamién participó, Luis Juárez, de la comisión permanente del Conseyu de la Mocedá dUviéu; y Catalina del Riego y Lucy Madelaine Humphreys, del colectivu TOC-Faes, formáu por persones altamente sensibles.
El festival cunta cola collaboración del Conceyu d’Uviéu, el Conseyu la Mocedá Uviéu, el Conseyu de la Mocedá del Principáu d’Asturies, l’Institutu Asturianu de la Mocedá y la Conseyería de Derechos Sociales y Bienestar.
Programa Zona Diversa Festival
El festival va abrise a les 19:00 hores en con Sâ Ba. Dj Set y les actuaciones de TOC-Faes (Estigma Queen); Habitaos, que va poner n’escena una pieza de danza comuñal con música en directu de Davide Salváu y Cibrán Seixo. Tamién va participar Oya, mire, vea, cola so danza performativa más una pieza coreográfica que va ser realizada por Natasha Ortiz, acompañáu de paisaxe sonoro pola Cachetona; y TechnoGuajas y D.Set, un colectivu asturianu de música electrónica. El festival presentalu Telmo Irureta.
