Marisa Valle Roso reinterpreta a El Presi en clave electrónica nel so single nuevu. L’artista llangreana versiona ‘El pañuelín’ como homenaxe a una de les figures de la canción asturiana que más la marcó.
EL PAÑUELÍN yá ta disponible en toles plataformes dixitales. Un viaxe más para esti pañuelu, con tola mio almiración escontra El Presi y el cantar orixinal, que tantes vegaes interpreté. Amor y desamor, Norte y Sur, lo ortodoxo y lo contemporaneo…Con otru vistíu, pero cola mesma emoción al cantala. Oxalá vos guste.
La carrera de Marisa Valle Roso ye inseparable de la canción asturiana. Nesti xéneru nació, medró y trunfó pa llueu xorrecer esplorando otres sonoridaes musicales. Asina ye como nel so single nuevu, ‘El pañuelín‘ homenaxea a una de les grandes figures de la canción asturiana: José González El Presi. Fáilo amás «dende otra perspectiva, dende otro llugar», como desplica l’artista nes sos redes sociales, y por eso lleva a esti cantar a un soníu de música electrónica con una potente base rítmica.
«Un viaxe más pa esti pañuelu, con tola mio almiración pa con El Presi y el cantar orixinal, que tantes vegaes interpreté», comenta la cantante llangreana reconociendo qu’»El Presi, xunto a Orestes Menéndez, marcó la mio música y la mio manera d’interpretarla d’una forma xabaz». D’esta manera nel so single nuevu -el quintu del so próximu trabayu– axunta «amor y desamor, Norte y Sur, lo ortodoxo y lo contemporáneo… Con otro vestíu, pero cola mesma emoción al cantala».
Amás d’en plataformes musicales, tamién va poder sentise a Marisa Valle Roso en vivo. Esti sábadu 21 de xunu, a les 23.30h, y con entrada llibre, actúa nel Parque Xovellanos de Mieres dientro de les fiestes de San Xuan.
