Sólo llanza’l so primer tema n’asturianu: ‘Foles’. Un cantar d’amor inspiráu nunos versos de Lourdes Álvarez da forma al tercer adelantu del proyectu nuevu del cantautor Alfredo González. Fonte: Musicasturiana.com
El pasáu mes de marzu presentábase en redes sociales Sólo, el proyectu nuevu d’Alfredo González tres dexar los escenarios a finales de 2023 col so nome artísticu. El cantautor turonés siempre amosó’l so compromisu cola llingua asturiana y agora ta acabante de publicar el so primer tema nel so idioma maternu: ‘Foles‘. Ta inspiráu nunos versos de la escritora Lourdes Álvarez y forma parte de Solitud, el primer discu d’esti proyectu que va ver la lluz pa la seronda .
«Ye una canción d’amor, col amor entendíu como universal y ensin ambición. Amor de vida que da vida, amor como tiempu que pasa ensin que caigas na cuenta. Amor, a la fin, de verdá. Escribíla pa cellebrar un aniversariu mui especial pa min, pa festexar cinco años d’ides, sorrises y roces d’eternidá. Pero tamién de llárimes, vueltes y golpes escontra’l suelu. Porque eso ye la vida entera con dalguien, un sistema cásique binariu onde’l ceru y el ún tienden a infinitu», desplica González sobre esti cantar. Amás añade que «fala de ‘Foles’ porque eso somos, persones al vientu que crecen pa decrecer pero que siempre vuelven. Somos persones que pasen la vida mirando p’arriba y confiando en que les ñubes nos dexen ver el cielu. Anque seya una cuestión de fe».
Sólo publica esti tema un día enantes del so primer conciertu n’Asturies. Esti martes 24 a les 19h va xubir al escenariu del Parque Xovellanos de Mieres pa poner el ramu a la programación de les fiestes de San Xuan qu’entamen dende’l conceyu de la Cuenca’l Caudal.
Solu y apegáu a lo lliterario
Muncho tiempu pasó desque Alfredo González xubiera per primer vez a un escenariu en 2021. Col so nome y apellíu asoleyó seis discos de llarga duración, dos EPs y dio una montonera conciertos per dientro y fuera d’Asturies. Tamién tuvo’l reconocimientu de la crítica, algamando premios como los AMAS o’l Camaretá. L’asturianu y el castellanu convivieron nes sos composiciones propies y tamién n’ayenes, porque tien escrito canciones p’artistes como Silvia Quesada, Muyeres o Alienda. El 25 payares de 2023 punxo puntu final a la so trayectoria como Alfredo González y el marzu pasáu renació como Sólo.
«Ye Sólo con tilde porque equivale a solamente, porque ye únicu y porque, anque ta en soledá, busca evitar ambigüedades. Pero tamién ta solo, porque asina lo decidió, porque los años lleváronlu a esta solitú buscada», esclaria’l testu de presentación del proyectu ellaborao pola so axencia de contratación, Dani Patch Management. Amás, desplica qu’en Sólo «importa la música pero más, tovía, la lletra, la intención y la dirección del argumentu«. D’esta manera, el proyectu ta «apegáu a lo lliterario y por eso en cada cantar hai una referencia a dalgún autor o autora ayenos. Yá seya en forma d’estrofa o estribillu, de spoken word o cola musicalización d’un poema enteru». Los tres temes que tien publicaos, ‘Foles‘, «Cuerpo de cerilla» y «Canción fatal» son una amuesa d’ello.
