La Ciudá nel Mar publiquen el so primer cantar, ‘Foles ermes’. Esti tema enllenu de sensibilidá axunta canción d’autor, folk, indie-pop y lliteratura y ye un adelantu del EP que van asoleyar esti añu. Fonte: Musicasturiana.com
La Ciudá nel Mar yá ye una realidá. Tres d’estrenase ayeri en directo dientro de la Feria del Llibru de Xixón, esta banda nueva llanza güei en toles plataformes musicales el so primer cenciellu: ‘Foles ermes‘. Trátase d’un cuidáu cantar que tresmite perbién la identidá del grupu al amestar canción d’autor, folk y indie-pop. Too ello con munchu pesu de la lliteratura, como reflexa el qu’esta lletra ta dientro de la novela Pel norte n’El Cantu Llunada, obra de Marina Pangua, vocalista, guitarrista y percusionista del cuartetu.
«Foi una lletra qu’escribí fai un tiempín y el cantar escoyímoslu como single porque foi’l que nos salió del corazón y el que nos pidía’l cuerpu d’ente tolos qu’había», desplica Pangua sobre esta pieza compuesta por ella mesma y que contién l’entemediu musical ‘La Espluma’ de la vigulinera Celia Nieto. El tema ye un adelantu del EP qu’esta banda va llanzar enantes qu’acabe l’añu: «El 4 de xunetu vamos sacar el siguiente single, p’agostu el tercer adelantu y otru más n’ochobre», avanza la cantante.
«Tuvimos super agusto. Fízosenos curtiu’l tiempu de enriba l’escenariu y amás mui prestosu’l patiu del Antiguu Institutu, un sitiu mui guapu», valora Marina Pangua sobre’l conciertu d’ayeri na FELIX. Pronto va haber más porque, como reconoz, yá tienen más feches zarraes que van dir anunciando a la par que van dir sintiéndose les sos composiciones nueves en plataformes musicales.
Música, amor y pallabres
A finales d’abril presentáronse La Ciudá Nel Mar, cuartetu integráu por Andrés García (guitarra), Marina Pangua (voz, percusión, guitarra), Celia Nieto (vigulín) y Ángel ‘Tom’ Villa (vigulín). Como recueye’l so recién creáu perfil de Spotify ye «una formación musical que naz de la emoción, del amor pola música de raíz y de la fuercia de les pallabres«. D’esta manera «fai’l so soníu con llibertá: xuega coles voces y los instrumentos pa dar forma a les canciones que compón la so cantante, la cantautora Marina Pangua, nes que la lletra n’asturianu ocupa un llugar central». Musicalmente tamién «bebe del folk y entemez los ecos de vieyos sones de la tradición oral coles testures d’otres músiques, creando una esperiencia delicada, honesta y viva».
