Educación va invertir cinco millones para impartir asturianu nel segundu ciclu d’Infantil. La midida va suponer la contratación d’un centenar de profesores de llingua y va aplicase tamién a la Escuela Oficial d’Idiomes.
- Fonte: El Comercio / Actualidá Asturies /
L’alcalde de Bimenes, Aitor García, el de Nava, Juan Cañal; el director xeneral d’Acción C. y Normalización Llingüística, Antón García; los conceyal de Bimenes Isabel Montes y José Luis Sánchez, y la conseyera d’Educación, Eva Ledo. Y. C.
La conseyera d’Educación, Eva Ledo, anunció en Bimenes que’l Gobiernu d’Asturies ta peracabando’l desenvolvimientu normativu para empezar a ufiertar el próximu cursu l’asturianu nel segundu ciclu d’Infantil y na Escuela Oficial d’Idiomes. «va dexanos ampliar la ufierta y responder a lo que dicta’l Plan d’Usu y Normalización del Asturianu, que ye un preséu que promueve l’empléu y l’espardimientu de les nueses llingües en diversos ámbitos», comentó la conseyera.
Ledo asistió ayeri en Martimporra a los actos de XXIX Fiesta de la Oficialidá de la Llingua, nel primer conceyu que declaró oficial l’asturianu, fai 29 años, nun xestu simbólico y reivindicativo. «Tamos, poro, nel meyor escenariu pa esplicar les principales midíes y meyores de la Conseyería na defensa y promoción del asturianu y l’eonaviego nes nueses aules», espresó la conseyera.
Ledo precisó qu’esi primer aproximamientu al asturianu o’l eonaviego n’Infantil «va tener calter voluntariu» y va llevase a cabu, de forma simultánea, nos trés cursos del segundu ciclu, na área denominada Comunicación y Representación de la Realidá. Esta iniciativa va suponer l’empléu d’una partida presupuestaria de cinco millones d’euros contemplada nes cuentes rexonales d’anguaño– y la contratación d’un centenar de docentes.
La conseyería unvió un formulariu a los centros pa conocer l’interés qu’espierta esta nueva ufierta educativa. Colos datos arrexuntaos d’alredor de 200 colexos, la inscripción, según cifres apurríes pola conseyería, supera los 6.000 estudiantes, que representen más del 60% de los posibles. «Entá ye llueu pa saber la respuesta esacta de les families, pero, en principiu, la valoración que faemos ye positiva», dixo la conseyera.
¡Norabona, yá yes suscriptor! Mantente al día coles noticies que t’importen y afonda nel analís de l’actualidá, y munches más ventayes. Faite parte d’esta esperiencia única al traviés de les nueses páxines y dende cualquier dispositivu.
La especialidá docente. Per otru llau, Ledo fixo referencia al pactu Asturies Educa, robláu esta selmana con cuatro organizaciones sindicales, onde figura’l compromisu de volver treslladar al ministeriu que se reconoza la especialidá docente de Llingua Asturiana, una histórica demanda del profesoráu.
Les novedaes del próximu cursu enmarquense nuna política de gobiernu desenvuelta nos últimos años. Otres iniciatives fueron la recuperación el cursu pasáu de l’Axenda Didáutica, en collaboración cola Conseyería de Cultura, Política Llingüística y Turismu, con un programa d’actividaes pa la promoción social del asturianu y l’eonaviego. Y anguaño incorporáronse per primer vegada dos distinciones a la conocencia del asturianu y l’eonaviego nos premios estraordinarios al rendimientu académicu.
La conseyera apurrió un últimu datu «que demuestra l’interés escontra la conocencia d’asturianu». La inscripción pa realizar en septiembre les pruebes llibres de certificación d’asturianu nos trés niveles ufiertaos (A2, B2 y C1) doblóse con al respective de la convocatoria anterior, pasando de 121 a 246 persones inscrites. «Esto paez demostrar que caminamos na dirección fayadiza», concluyó.
