Un establecimientu de Xixón asítiase como uno de los meyores diez restoranes ensin gluten de toa España. Una reconocencia que llegó de manera inesperada, pero tres dellos años d’esfuerzu y trabayu, según reconocía Alberto Puebla propietariu d’El Palace, un restorán 100% ensin gluten allugáu na plaza del Marqués.
Anque El Palace ye unu de los establecimientos más reconocíos de la ciudá, va dos años tomó un nuevu aldu cuando Alberto Puebla adquirió’l negociu. Nesta nueva etapa, l’hosteleru xixonés decidió apostar por una nueva propuesta que, anque venturera, terminó siendo tou un ésitu ente los comensales. Y ye qu’esti restorán asitiáu en plenu corazón de Xixón cunta con una carta 100% ensin gluten.
«De primeres dímos-y menos publicidá de la qu’al meyor correspondía, porque nun sabíamos si’l veceru diba tar d’alcuerdu. Entá hai xente reticente a pensar que cualquier cosa ensin gluten nun va tener el mesmu sabor o que va ser distintu a la comida a la que ta acostumada», esplica Puebla. Al ver que la carta empezaba a gustar a quien pasaben pol local y que’l so ésitu diba aumentando adulces, El Palace empezó trabayar mano a mano cola Asociación Asturiana de Celíacos. «Decidimos da-y un pocu más de bombu y la verdá ye qu’empezó a funcionar perbién ente les plataformes de celíacos y, sobremanera, nes redes sociales».
Pero esti ésitu non solo caló ente los comensales, el pasáu 14 de xunetu, El Palace pasaba a formar parte del Ranking Celicidad de los 10 Meyores Restoranes Ensin Gluten d’España. Pa la ellaboración d’esta selecta llista tiense en cuenta la valoración de más de 44.000 usuarios rexistraos na App Celicidad y na web de restoranes con opciones ensin gluten de Celicidad. P’Alberto Puebla, esti puestu supon un reconcomiendo «a tol trabayu que llevamos realizando estos años; date cuenta de que tol esfuerzu mereció la pena».
Pero ¿cuál ye’l secretu del so ésitu? Alberto tienlo claro: «poder comer croquetes, calamares o cachopu cola seguridá de que son 100% ensin gluten». Y ye qu’en El Palace, asegura Puebla, «nun hai posibilidá de contaminación». «Como nengún platu llega gluten nun esiste xuna contaminación cruciada». Amás, esclaria que la persona que sirve la cerveza —con gluten— nun tien contactu en nengún momentu colos platos que darréu son sirvíos a los comensales.
Reinventáu El Palace
El serviciu de restauración nun ye lo único que trunfa n’El Palace. Esti local cunta amás con sesiones de vermut y tardeo, afaciéndose a les nueves modes qu’adulces paecen dir siendo una alternativa pal ociu nocherniegu. El restorán abre les sos puertes dende les 12.00 hores hasta les 02.00 hores con un serviciu siguíu. N’El Palace les mañanes empiecen cola sesión vermut, pa siguir coles comíes. En cuanto al tardeo, en munches ocasiones, atópase amenizao pola música en directu; y tres les cenes, ufierten servicios de cócteles de la mano de Borja Cortina, campeón d’España de coctelería y dueñu del chigre Varsovia.
Pero la renovación d’El Palace nun foi xera senciella. Según esplica’l mesmu Alberto, «la xente de Xixón nun solíen venir comer al restorán porque lu acomuñaba como un sitiu pa turistes». Por ello, unu de los oxetivos principales del hosteleru siempres foi recuperar al veceru local, porque gracies a ello «sobrevivimos mientres l’añu», apunta.
Asturies ensin gluten
El Palace nun foi l’únicu restorán asturianu que se consiguió asitiar ente los diez meyores restoranes ensin gluten d’España. El Fartuquín, allugáu n’Uviéu, caltiense nel ranking dende los sos entamos en 2016, consiguiendo inclusive la posición númberu 1 nel añu 2022. Esti restorán de la capital asturiana convirtióse col pasu del tiempu nun referente de la restauración ensin gluten. Amás, 2019 xunió al so palmarés el premiu FACE al Meyor Restorán Ensin Gluten d’España. La so cocina tradicional asturiana fáen-y repitir añu tres d’añu ente lo meyor del sector pa les persones que tienen de vivir ensin gluten.
Mari Fernández, dueña del Restorán Fartuquin
«Oxalá más restoranes ufiertaren los mesmos servicios para celiacos que nós»
Per otru llau, l’asturiana de Cangas, Lorena Pérez, directora de Celicidad, recibió’l pasáu 4 de xunetu’l Premiu Influceliac@ na categoría de Meyor Divulgadora Profesional Sanitaria pol so llabor de divulgación de la Enfermedá Celiaca. Pérez ye dietista y periodista y lleva dende 2015 creando información y conteníos rellacionaos cola Celiaquía y la Dieta Ensin Gluten.
