L’Arcu Atlánticu espurrise hasta los diez díes en Xixón: 60 actividaes nel so décimu aniversariu. Va celebrase del 25 de xunetu al 3 d’agostu en diez escenarios y ente les sos novedaes, «va potenciar la identidá cultural que supon la música coral». https://www.instagram.com/arcuatlanticu
N’asturianu, reivindicando la celebración d’esti festival «que tanto nos costó recuperar» y animando a la xente a que sala a les cais «con munches ganes de celebrar una gran folixa n’honor a la nuesa rica y diversa cultura».
Asina presentó ayeri la concejala de Cultura, Montserrat López Moru, la X edición del Festival Arcu Atlánticu. El programa nació en 2012 y volvió el pasáu añu –tres cinco de parón al ser suspendíu na etapa de l’alcaldesa Ana González– «con más fuerza que nunca y bien anováu», destacó la edil.
L’Arcu va estendese mientres diez díes. El gruesu cultural del festival va tener llugar del martes 29 de xunetu al domingu 3 d’agostu. Va haber cuatro díes más porque’l tradicional mercáu gastronómicu va arrincar el vienres 25 de xunetu en Campo Valdés con Portugal como país invitáu. Amás de dar a conocer los productos de la comida lusa van llevase a cabo talleres sobro «la cada vez más reconocida y saludable dieta atlántica», destacó la edil.
La sidra, la gran protagonista Esta ye la primer edición na que la cultura sidrera ye Patrimoniu Cultural Inmaterial de la Humanidá, «lo que tamién ye otru motivu de celebración y de xacíu d’espardimientu». Nos Xardinos de la Reina, van allugase dos carpes nes que dende’l miércoles 30 de xunetu y hasta la conclusión del Arcu Atlánticu va haber sesiones de talleres, cates y degustaciones de sidres tradicionales ellaboraes en Bretaña, Normandía, Inglaterra, País Vascu y Asturies.
Sesenta son les actividaes que se van desenvolver na so gran mayoría na cai, y que van xirar en redol a la música, el teatru, la danza, les artes plástiques y audiovisuales, la gastronomía o la danza, pero tamién va haber proyecciones audiovisuales, demostraciones d’artesanía, talleres y xuegos infantiles, según itinerarios teatralizados.
Les propuestes van ser en diez allugamientos de la ciudá: Xardinos de la Reina, plaza Mayor, plaza del Marqués, Periodista Arturo Arias (Lavaderu) y Xovellanos. Y para delles actividaes, que poles sos característiques nun puedan desenvolvese al campu, va tar l’Antiguu Institutu, la Escuela de Comerciu, el Muséu del Pueblu d’Asturies y la Colexata San Juan Bautista.
