Fonte: Actualidá Asturies / Informativos T5
El Gobiernu d’Asturies impulsa los primeros cultivos soterraños del país con un proyectu d’agricultura minera nel pozu Carrio de Llaviana. L’oxetivu ye analizar qué especies pueden afaese meyor so tierra para llograr una producción sostenible y adaptable al cambéu climáticu. El conseyeru Borja Sánchez asegura que la iniciativa va contribuyir al desenvolvimientu territorial al traviés d’un nuevu usu para los antiguos xacimientos.
El Serida desenvuelve un invernaderu piloto con unu plantíu de cinco variedaes vexetales n’una bocamina con llume led. El Gobiernu d’Asturies punxo en marcha un proyectu singular ya innovador que convierte una antigua bocamina del pozu Carrio, en Llaviana, nel primer invernaderu soterrañu del país.
Trátase d’una iniciativa pionera d’agricultura minera, enmarcada nel programa Agroalnext, financiáu con fondos rexonales y europeos Next Generation, que busca sentar les bases de l’agricultura del futuru: verde, dixital y resiliente al cambéu climáticu.
El conseyeru de Ciencia, Industria y Empléu, Borja Sánchez, visitó güei les instalaciones del proyectu esperimental, qu’ensaya cultivos en condiciones estremes por aciu un sistema d’hidroponía –un sistema de cultivu que prescinde de la tierra- nun ambiente controláu ensin lluz natural, sofitáu con llume ‘led.
L’ensayu piloto desenvuélvese na galería La Raya del pozu Carrio ya inclúi cinco variedaes vexetales: biltos d’usu culinariu, plantes arumoses, fueyes verdes, wasabi, arbeyos, hongos hongos y salicornia, una planta halófita que s’afai a ambientes estremos. L’oxetivu ye analizar qué especies pueden afaese a redolaes soterrañes, col fin d’abrir una nueva vía de producción agroalimentaria, sostenible y enerxéticamente eficiente.
El Serviciu Rexonal d’Investigación y Desenvolvimientu Agroalimentario (Serida) encargóse de la puesta en marcha d’esti proyectu nel marcu del polu d’innovación de Carrio y cola collaboración de la empresa minera Hunosa, propietaria de la bocamina.
El desenvolvimientu técnicu cuerre al cargu de la compañía asturiana Cantábrica Agricultura Urbana, especializada en cultivos d’interior por aciu sistemes d’agricultura vertical, capaces de reciclar l’agua y funcionar ensin esposición a la lluz solar.
El proyectu promueve l’Agricultura 4.0 como una actividá económica de futuru para les cuenques mineres asturianes. Les resultancies de la fase esperimental van sirvir de base para esquizar futuros invernaderos nos xacimientos soterraños, que van ser sostenibles y autosuficientes, yá que van poder nutrise de l’agua y enerxía de les antigües esplotaciones.
Na visita, el conseyeru tuvo acompañáu pola directora del Serida, Mamen Oliván; l’alcalde de Llaviana, Julio García; la xerente del Centru d’Innovación Carrio, Susana de la Fonte; representantes d’Hunosa y técnicos de la empresa Cantábrica Agricultura.
Borja Sánchez destacó esta iniciativa como clave para dar un nuevu usu innovador y tecnolóxicu a les antigües mines: “Esti invernaderu soterrañu representa un pasu firme escontra l’agricultura del futuru. El proyectu combina ciencia, tecnoloxía y sostenibilidá para desestacionalizar los cultivos ya impulsar formes de producción que nos ayuden a encarar los retos del cambéu climáticu y el desenvolvimientu territorial”.
Una mina para’l futuru. Esta iniciativa pionera forma parte de la estratexa del Gobiernu del Principáu de dar un nuevu usu a les infraestructures mineres. N’una comunidá con más de 5.000 kilómetros de galeríes soterrañes, l’Executivu autonómicu trabaya para tresformales n’espacios de desenvolvimientu tecnolóxicu y científicu amestaos a nueves actividaes económiques como la agroalimentación avanzada, l’almacenamientu de datos o la investigación sobro l’habitabilidad de la Lluna.
L’usu d’infraestructures como mines o búnkeres pa instalar invernaderos cunta con esperiencies en países como Reinu Uníu, Italia o Finlandia, pero ye la primer vegada que s’utilicen antigües galeríes mineres pa esti fin n’España. Les instalaciones soterrañes garanticen temperatures y mugor constante, amenorguen el consumu enerxéticu y dexen ciclos de cultivos continuos.
El proyectu d’agricultura minera allinia los sos oxetivos cola estratexa europea De la granxa a la mesa y con enfoques como One Health, que conecten alimentación, salú y sostenibilidá. Asturies apuesta asina por una agricultura moderna, eficiente y respetuosa cola redolada, capaz de xenerar empléu, afitar población nes zones rurales y dar una segunda vida al so patrimoniu industrial.
