Esti vienres entama la 54ª edición del Festival Interceltique de Lorient. Una representación asturiana qu’axunta artistes con estilos estremaos tará presente nesta edición dedicada a «Les Cousins d’Amerique». Musicasturiana.com
El vienres 1 d’agostu, entama en Lorient la 54ª edición del Festival Interceltique de Lorient, esti añu cola temática de «Les Cousins d’Amerique», dedicada a «los primos» de la costa este de los Estaos Xuníos: Acadia, Luisiana, Quebec, Nuevo Brunswick, la islla del Cabu Bretón, Nueva Escocia, Boston y Nueva York.
La delegación asturiana cunta esti añu con una bona representación qu’axunta artistes y agrupaciones con estilos y enfoques estremaos. Les primeres actuaciones asturianes van tener llugar el sábadu 2 d’agostu; pela mañana, a les 10:00, el gaiteru Pablo Carrera va tar poniendo una clas maxistral de gaita nel espaciu «Le Palais». El Grupu de baile San Félix de Candás tamién entama cola so participación esi mesmu día, dientro del espectáculu «Horizons Celtiques», que se repite durante 5 díes siguíos. El xueves 7,formarán parte de la muestra «Musiques et Danses des Pays Celtes», y tamién van tar faciendo un taller de baille tradicional el vienres 8. Nel «Horizons Celtiques» van coincidir cola Banda de gaites La Reina del Truébano, quienes tamién participen na muestra ya mentada, el martes 5, y n’un desfile pela tarde’l vienres 8.
Marisa Valle Roso ye una de les artistes que van representar Asturies n’esta edición, llevando les sos novedaes d’esti añu pa la bretaña francesa. Va dar un conciertu el sábadu 2 na «Place des Pays Celtes». Nesi mismu escenariu, el domingu 3, Guieldu van llevar la so música celta con influencies del New Age y el folk-rock, que quedó plasmada nel so reciente trabayu discográficu «Memories de Deva».
El llunes 4, nel nuevu espaciu de la «Taverne Celte», va ufiertase un conciertu-cena con gastronomía asturiana y los conciertos d’Eva Tejedor y Les Pandereteres, suiguíes d’Alienda. La formación de pandereteres tamién va tar presente al día siguiente, martes 5, na Place des Pays Celtes, y esi mesmu día, pela nueche, na Quai de la Bretagne. Pela so parte, Alienda van tocar tamién el martes 5 en «Le Kleub», y el miércoles 6 na «Place des Pays Celtes».
Completen la representación asturiana dos nomes fundamentales del folk y la música tradicional asturiana: Bada & Muñalén ye’l formatu dúu col que Rubén Bada y Pepín de Muñalén van facer el so conciertu el miércoles 6, en «Le Palais». Y Rubén Bada tará tamién participando como parte de los músicos qu’integren l’espectáculu Celtic Odysée #4, que podremos esfrutar el xueves 7, n’unu de los dos pases que van facer.
Amás, cuatro gaiteros asturianos van tar compitiendo nel 38º Troféu MacCrimmon de gaita: Diego Fernández, Diego Lobo, Pelayo suárez y Luis E. Sánchez.
