El pabellón del Principáu na Fidma, dedicáu a la cultura sidrera, bati récord históricu con más de 100.000 visitantes. El estand, qu’acoyó más de 104 actividaes y una programación centrada na bébora rexonal, conectó con públicu de toles edaes y procedencies. Esta edición marca un máximu de participación, con una media diaria de más de 7.000 persones y picos d’hasta 11.950 n’una sola xornada L’apueste del Executivu autonómicu por un programa tresversal y participativu convirtió l’espositor nun referente de dinamización cultural, industrial, institucional y turística.
La conseyera de Cultura, Política Llingüística y Deporte, Vanessa Gutiérrez, visitó güei el pabellón institucional del Gobiernu d’Asturies na Feria Internacional d’Amueses d’Asturies (Fidma), onde fixo balance d’una edición histórica: el estand superó los 100.000 visitantes, una cifra que convierte esta edición na más allegada desque se tien rexistru.
El día de mayor arribación foi’l 13 d’agostu, con 11.950 persones, lo que tamién marca un récord diariu absolutu. En comparanza con 2024, la crecedera foi significativu: pasóse de 87.640 a 100.169 visitantes, ensin cuntar entá los datos d’esta última xornada.
“L’ésitu atayante del estand nesta edición, que los sos datos definitivos d’arribación van suponer en redol a 20.000 visitantes más que’l pasáu añu -nel que yá llogremos unes cifres bien positives-, amuesa la estraordinaria identificación de la ciudadanía cola cultura sidrera asturiana, apocayá reconocida pola UNESCO como Patrimoniu Cultural Inmaterial de la Humanidá, y el gran curiosu de la nuesa singularidá para les persones que nos visiten, según el compromisu del Gobiernu col nuesu patrimoniu, la nuesa cultura tradicional y les sos diverses manifestaciones”, valoró Gutiérrez.
Sol lema Asturies ye sidrera. Lo’l nuesu ye mundial, el pabellón ufiertó una esperiencia inmersiva que dexó al públicu percorrer el ciclu completu de la sidra, dende la pumarada hasta’l escanciáu, con más de 104 actividaes diseñaes para tolos públicos. Talleres gastronómicos y artísticos, esperiencies virtuales, cantares de chigre, cuentacuentos, recreaciones históriques, degustaciones y demostraciones d’escanciáu enllenaron cada xornada de conteníu y participación.
El perfil de visitantes foi mayoritariamente de la comunidá (85,07 %), anque tamién se rexistró una notable presencia nacional (13,14%) ya internacional (1,79%). La participación foi masiva y constante, con aforos completos na mayoría d’actividaes.
Amás, celebráronse 26 visites institucionales oficiales y 27 presentaciones, actos y xuntes de trabayu, consolidando’l pabellón como espaciu de referencia para la proyección institucional y la cooperación intersectorial.
Unu de los momentos clave d’estes selmanes foi la presentación, el pasáu 12 d’agostu, del Programa tresañal d’acciones de preservación y promoción de la cultura sidrera asturiana, una estratexa integral que recueye 115 midíes arrexuntaes en cinco grandes exes. Esti programa tresañal, impulsáu pol Executivu autonómicu, busca convertir la cultura sidrera en motor de desenvolvimientu territorial, turísticu, educativu, económicu y cultural.
La conseyera sorrayó tamién l’altu índiz de prestu del públicu que visitó’l estand, según la participación nel mesmu de numberoses entidaes, persones espertes y empreses del sector: “La ciudadanía fixo so esti llugar, porque la cultura ye un espaciu de diálogu, tradición y alcuentru que compartimos y forma parte de la nuesa identidá. La puesta en valor d’esi patrimoniu común y la collaboración con numberosos axentes ya instituciones foi l’ésitu de la candidatura nel so momentu, y l’ésitu agora d’esti estand y de toa iniciativa que reconoz lo nueso con arguyu de pertenencia”.
“Esta edición de Fidma constitúi un finxu. Batimos récords, pero sobremanera reforcemos el venceyu ente Asturies y el so patrimoniu. La cultura sidrera ye tradición, ye innovación, motor económicu, sostenibilidá, ye comunidá y, principalmente, un futuru escontra’l qu’avanzamos de la mano”, concluyó Gutiérrez.
