- Les llinies d’ayudes impulsaes pola conseyería prioricen proyectos que fomenten l’equilibriu territorial y tienen una incidencia especial en conceyos de menos población.
- La conseyera destaca en Cangas del Narcea cómo “dos festivales celebraos nesti conceyu nes últimes selmanes reciben una inversión de más de 80.000 euros qu’impacten directamente na economía y la vida cultural local”
La conseyera de Cultura, Política Llingüística y Deporte, Vanessa Gutiérrez, participó esta mañana na presentación d’una edición nueva del Prestoso Fest en Cangas del Narcea, onde sorrayó’l papel clave d’esti tipu d’iniciatives “como una referencia afianzada con más d’una década d’historia, exemplu de festival cultural desenvueltu en zones rurales, de calter sostenible, respetuosu y comprometíu col entornu natural, qu’ufierta una programación de calidá al tiempu que dinamiza la economía y la cultura local”.
El festival, que se celebra esti fin de selmana nel llugar de Las Barzaniel.las, cunta con una subvención cercana a los 50.000 euros del Gobiernu del Principáu.
Na so visita al recintu del festival, la conseyera reiteró “l’apueste firme de la Conseyería de Cultura por esti tipu d’eventos”, y esplicó que, namás al traviés de dos llinies d’ayudes —una destinada a desenvolver proyectos singulares con incidencia especial nel mediu rural, y otra centrada en festivales culturales—, el Principáu destina más de 700.000 euros pa facer posible la celebración de 44 festivales en tol territoriu asturianu nesti 2025.
Vanessa Gutiérrez afirmó que “estes ayudes son un reflexu del compromisu del Gobiernu d’Adrián Barbón colos derechos culturales de la ciudadanía, yá que garanticen l’accesu, la participación y el desenvolvimientu de la vida cultural, amás d’ayudar a la profesionalización del sector y a la dinamización del mediu rural”. Recordó que les bases d’estes subvenciones prioricen proyectos que fomenten l’equilibriu territorial, involucren a los y les creadores locales y se desenvuelvan en conceyos con menos densidá de población.
A manera d’exemplu, señaló que “namás colos festivales Viña y Obra y el Prestoso Fest, celebraos esti branu en Cangas del Narcea, la Conseyería fixo una inversión de más de 80.000 euros que repercute directamente nel conceyu y nel texíu cultural y económico”.
Amás del impactu cultural y social, la conseyera quixo destacar l’impactu económicu que xeneren esti tipu d’eventos. Nel casu concretu del Prestoso Fest, la organización calcula la creación d’un cientu d’emplegos directos y indirectos nos díes de celebración del festival, lo que da cuenta del papel que desempeñen estos eventos como motores de desenvolvimientu económicu local, sobre manera en zones rurales.
“El Prestoso ye un exemplu claru de cómo la cultura, amás de ser un derechu, pue ser una ferramienta eficaz pa fixar población, xenerar oportunidaes llaborales y proyectar la identidá asturiana más p’allá de les nuestres fronteres”, concluyó.
