Casa Niembro, Tierra Ástur-El Vascu y La Puerta de Cimadevilla incorporase a la marca calidable de les sidreríes. La bébora y los sos productos derivaos van tener protagonismu nos actos institucionales y van promocionase con acciones de turismu, educación, innovación, protección patrimonial y comunicación. “Esti programa ye una ferramienta para curiar y faer crecer esta seña d’identidá”, afirma la vicepresidenta, Gimena Llamedo.
El Gobiernu d’Asturies presentó güei el Programa tresañal d’acciones de preservación y promoción de la cultura sidrera asturiana, qu’inclúi barganal de 115 midíes, con oxetivos específicos y acciones concretes, para fortalecer, dar visibilidá y caltener esti patrimoniu cultural inmaterial reconocíu apocayá pola Unesco.
La vicepresidenta del Principáu, Gimena Llamedo, y la conseyera de Cultura, Política Llingüística y Deporte, Vanessa Gutiérrez, presentaron güei esti programa integral nel pabellón institucional del Executivu na Feria Internacional d’Amueses d’Asturies (Fidma), dedicáu nesta edición a la cultura sidrera y qu’espertó gran interés.
“El mundu de la sidra ye muncho más qu’una bébora: ye hestoria, ye paisaxe, ye llingua asturiana, ye oficiu, ye comunidá. Esti plan ye una ferramienta para curialo, proxectalo y faelo crecer”, señaló Llamedo. Amás, añedió que naz como “un programa vivu, en constante evolución, construyíu dende’l Gobiernu d’Asturies y arriquecíu col trabayu de los colectivos y profesionales qu’integren la mesa de trabayu de la cultura sidrera”.
Nesti marcu, l’Executivu autonómicu va dar protagonismu a la bébora asturiano más internacional y a los productos que deriven d’ella, nos actos institucionales, “como espresión d’identidá, tradición y sofitu al sector”, sorrayó la vicepresidenta. Esta midida contemplase nel plan estratéxicu, que tamién recueye l’impactu que tuvieron los 15,4 millones de fondos europeos xestionaos na última década pol Principáu para impulsar la cultura venceyada a la sidra.
El programa de trabayu de la cultura sidrera asturiana s’estructura en cinco exes estratéxiques:
- Analís de situación y perspectives de futuru. El plan inclúi la ellaboración d’un diagnósticu integral del ecosistema sidreru asturianu, con encuestes a axentes del sector y a la comunidá tresmisora d’esti legáu, para identificar fortaleces, debilidaes y oportunidaes. Esti analís va sirvir de base para la planificación d’acciones y la toma de decisiones.
Protección y sensibilización. Inclúi midíes educatives como la incorporación de conteníos sobro la sidra nel currículu escolar, la edición de materiales didácticos y divulgativos, y la celebración del Día Mundial de la Sidra cada 3 de xunu.
Tamién contempla acciones culturales, como la ellaboración d’un inventariu y la convocatoria d’ayudes pa la restauración de llagares tradicionales y elementos muebles venceyaos, la programación d’esposiciones itinerantes, la edición de publicaciones sobro la hestoria y el vocabulariu sidreru, y l’impulsu d’actividaes nel Muséu de la Sidra d’Asturies. Amás, va reforzase’l protagonismu de la sidra y los sos productos derivaos n’actos institucionales, como espresión d’identidá.
- Impulsu al sector sidreru. El plan recueye ayudes a la producción, caltenimientu de variedaes autóctones, incorporación de moces, dixitalización, formación profesional, investigación aplicada y promoción de la denominación d’orixe protexida (DOP) Sidra d’Asturies. Tamién enceta l’impactu que yá tán teniendo los recursos europeos disponibles pal sector, según el fortalecimientu de la relación ente’l sector y l’Alministración.
- Estratexa turística. Esti apartáu busca tresformar la cultura sidrera nun productu turísticu estructuráu, capaz de xenerar impactu económicu, social y cultural. Pa ello, prevese’l diseñu de rutes temátiques, esperiencies gastronómiques, señalética específica y ferramientes dixitales como mapes interactivos y escanciáu virtual.
Amás, va impulsase la presencia de la sidra en feries nacionales ya internacionales, como Fitur, y va promovese la so inclusión en campañes publicitaries d’altu impactu, tanto en medios convencionales como dixitales. El floriamientu de #el pumar, l’escanciáu en vivu y la marca Sidreríes d’Asturies consolídense como elementos icónicos de la propuesta.
El plan tamién contempla aliances estratéxiques col sector turísticu y hosteleru pa integrar la sidra en paquetes turísticos, agospiamientos y eventos, de cuenta que se refuerce la so función como seña d’identidá asturiana. Asina, va fomentase la celebración de festivales temáticos, la collaboración con ceadores de conteníu y la participación activa en feries especializaes.
Esta estratexa allíniase colos principios del turismu responsable, la sostenibilidá territorial y la puesta en valor del patrimoniu inmaterial que definen la política turística del Gobiernu d’Asturies.
- Comunicación, evaluación y siguimientu. va ellaborase un plan de comunicación específicu pa tolos grupos d’interés y van realizase encuestes de prestu y analís d’impactu turísticu y cultural.
El plan va actualizase dacuando en función de les resultancies y va tener un contactu permanente col sector. Esta participación enríase anguaño al traviés d’una mesa de trabayu qu’ellaboró esti programa cola coordinación del Principáu.
- Distintivu Sidreríes d’Asturies- Calidá Natural. Mientres l’actu celebráu na Fidma tamién s’apurrieron les plaques de la marca Sidreríes d’Asturies-Calidá Natural a trés nuevos establecimientos. Esti sellu, que yá estrema a 29 sidreríes, garantiza que, detrás de cada culín, hai calidá, respetu pol productu y compromisu cola tierra.
Los negocios que güei recoyeron les sos plaques son los siguientes:
- Casa Niembro (Cabrales). Pioneros del turismu gastronómicu, fueron de los primeres n’ufiertar una esperiencia enoturística integral y afecha a tolos públicos, cola so Ruta’l Quesu y la Sidra. Con llagar propiu, son exemplu de coherencia ente productu, tradición y paisaxe.
- Tierra Ástur-El Vascu (Uviéu). Tierra Ástur nació del enfotu de los sos fundadores por averar los productos del mediu rural al corazón d’Asturies. Col tiempu, supieron treslladar a la ciudá’l conceutu de chigre-tienda y fundir l’espíritu del chigre tradicional con una proyección turística qu’epondera’l productu local.
- La Puerta de Cimavilla (Uviéu). En plenu cascu históricu de la capital asturiana, esta sidrería fixo de l’autenticidá’l so sellu.
