🎙️ Na actualidá ye cantante, lletrista y percusionista de @laciudanelmar -cuartetu col que lleva unos meses asoleyando cenciellos y que va sacar el so primer EP esti payares- y de @muyeres.oficial , formación cola que participó nos espectáculos ‘20 años sobre la escena asturiana’, ‘País Malva’, ‘Humanes’ ✒️ Nel so llabor d’escritora, foi ganadora del I premiu ‘Muyer’ de Narraciones @edicionestrabe cola novela Pel norte n’El Cantu Llunada.
🎶 Con ella siguimos cola estaya La Banda Sonora De…, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten. Músicasturiana.com
Marina Pangua (Uviéu, 1992) ye cantante, compositora y escritora. Dende la cuna tuvo venceyada a la música asturiana -ye fía de Pedro Pangua (Ubiña, Xaréu, Nuberu) y hermana de Diego Pangua (Felpeyu, DRD)- y entamó dende mui neña a xubir a los escenarios, como amuesa que con 13 años yá fora cantante del grupu Verdasca, col que grabó’l discu D’Abéu. Na actualidá ye cantante, lletrista y percusionista de La ciudá nel mar -cuartetu col que lleva unos meses asoleyando cenciellos y que va sacar el so primer EP esti payares- y de Muyeres, formación cola que participó nos espectáculos 20 años sobre la escena asturiana, País Malva, Humanes. Nel so llabor d’escritora, foi ganadora del I premiu ‘Muyer’ de Narraciones Trabe cola novela Pel norte n’El Cantu Llunada.
Con ella siguimos cola estaya La Banda Sonora De…, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
- Un discu qu’enxamás canses de sentir.
Tuenda, el primeru.
- Si tuvieres que formar parte d’otru proyectu musical, ¿cuál sería?
Más que formar parte d’otru proyectu, prestaríame facer collaboraciones con otres músiques.
- De los cantares que compusisti o interpretes, ¿cuál ye’l to preferíu?
¿A qué fía/u quies más? Esta pregunta ye tremenda. Pero voi moyame: a día de güei diría que ye ‘Foles ermes’. Mui reñíu con dalgún que tenemos por grabar.
«Nel añu 2002 estrenóse pal día d’Asturies un conciertu con munchos de los grandes músicos de la escena asturiana: Mariluz Cristóbal, Ramón Prada, Nuberu, Tejedor, Victor Manuel… Yo tenía diez años y quedé ablucada col espectáculu vivíu aquella nueche na plaza la catedral d’Uviéu»
- ¿Cuándo foi la primer vez que xubisti a un escenariu y que pasó enantes, durante y depués?
Cuando yera neña, la escuela municipal de música de Llanera taba xorreciendo. A cantar en solitario, xubí per primer vez acabante cumplir los diez años. Canté ‘El hombre del piano’. Yá nun m’alcuerdo lo que pasó enantes, pero lo que sí sé ye qu’a cuenta d’aquello tuvi la suerte de pasar a ser la cantante de la Big Band de neñes y neños que dirixía’l profesor de vientu-metal, Baldomero Gutiérrez. Disfruté muncho de toes aquelles canciones —les primeres que me vienen al recuerdu son ‘Summertime’, ‘When I’m sixty-four’, ‘Fever’…— que preparamos con aquella banda d’unos trenta rapacinos de Llanera.
- ¿Qué ye lo más inxusto de ser artista?
Non siempre se reconoz el valor de lo bien fecho. Nun falo namásde lo económico, anque tamién. Cuasi toles amistaes que tengo que se dediquen a dalgún arte faenlo nos ratos llibres que-yos dexa’l trabayu que los alimenta.
- Si fueres Conseyera de Cultura, ¿qué son les primeres coses que fadríes?
Nun me veo capacitada pa dar una bona rempuesta sobr una llabor tan importante ya complexa. Siguiría apostando por tentar de detectar y apoyar el talentu creativu que tenemos nesta tierra: impulsalu, respaldalu, dalu a conocer na población grande y lo pequeño. Habría muncho de facer por posibilitar la música en directo y de tentar de facer que los profesionales de toles artes puedan tener unes bones condiciones llaborales.
«Convidaría al escenariu a dalgún pexe gordu de los que mueve’l mundu pa tentar de convencelu de que pare les guerres. Desque faiga eso, que se ponga rapidín a iguar lo del mediu ambiente»
- Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?
Nací nuna casa inundada pola música: sentía a mio padre estudiando guitarra nel cuartu d’al llau de la que me dormía, mio hermanu pasaba les tardes col punteru ente los abrigos del armariu pa nun molestar a los vecinos de la que deprendía a tocar la gaita… Fueron munchos los conciertos que vi en cuellu de mio madre. Y en coche, acompañábennos nos viaxes les cintes y discos de tola música n’asturianu que se ficiera hasta’l momentu y de les novedaes que diben saliendo. Yá daquella cantaba yo con Muyeres, lo que pasa que dende l’asientu d’atrás del nuesu Renault 21 coloráu.
Nel añu 2002 estrenóse pal día d’Asturies un conciertu con munchos de los grandes músicos de la escena asturiana: Mariluz Cristóbal, Ramón Prada, Nuberu, Tejedor, Victor Manuel… Yo tenía diez años y quedé ablucada col espectáculu vivíu aquella nueche na plaza la catedral d’Uviéu. Cuento que daqué tendría que ver pa qu’a los trece años m’animara a entamar a cantar nel grupu Verdasca, nel que por cierto la mayoría d’integrantes yéremos alumnos de mio padre. Daquella hasta tuvi l’honor de recibir unes clases de tonada de la grandísima cantante y amiga Mariluz Cristóbal.
Faciendo balance de too ello, ta claro que quien me marcó pa facer música n’asturianu foron la familia y tolos bonos intérpretes qu’hebo y qu’hai a día de güei n’Asturies. Y una preba de la calidá y bayura de la música asturiana, ye que podría facer agora mesmo otra llista d’otres tantes canciones y siguiríen quedándome fuera grandes temes y artistes.
«Con ‘Tú me dejaste de querer‘ de C. Tangana. Tengo sentimientos mui alcontraos con él, pero sentir esti tema a les ocho la mañana de la que conducía pal trabayu tienme arrancao bastante desidia »
- Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?
‘Tú me dejaste de querer’ de C. Tangana. Tengo sentimientos mui alcontraos con él, pero sentir esti tema a les ocho la mañana de la que conducía pal trabayu tienme arrancao bastante desidia y llevantao unos palminos l’espíritu.
- ¿A qué personaxe públicu convidaríes a un conciertu tuyu, a pasar llueu pel backstage y pa qué?
A dalgún pexe gordu de los que mueve’l mundu pa tentar de convencelu de que pare les guerres. Desque faiga eso, que se ponga rapidín a iguar lo del mediu ambiente.
- Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?
Como m’apasiona la lliteratura y amás tengo muncha gana de facer música, voi pedime tres: Hestoria Universal de Paniceiros de Xuan Bello, Díes de muncho d’Antón García y ¿por qué non una película de poesía? Al abellu les besties de Berta Piñán.
