Maya ye una abeyina como nenguna otra, inconformista y siempre naguando por aventures, dexó’l truébanu pa vivir nel prau, llibre como una abeya. El mundu ye demasiao grande y fascinante pa permanecer confinada a la vida zarrada del truébanu. Con esti espíritu atrevíu, Maya y el so amigu Willy viven una montonera d’aventures xunto a los demás animalinos del prau nel que viven.
L’abeya Maya vive llibre nel prau hasta que s’atopa cola inspección del xuez Bonacera, que nun comparte la so forma de vida. Un asocedíu va facer que les coses acaben d’otra manera.
Al visitar el truébanu, el xuez Bonacera descubre que Maya, en contra de les normes de les abeyes, vive llibre nel prau. Como-y paez que’l so estilu de vida pue ser una amenaza pa les otres abeyes, decide echala de la comunidá. Sicasí, cuando ataquen les aviéspores, Maya y los amigos van demostrar qu’ella tien un papel importante nel grupu y van volver a aceptala.
Maya, Willy y Nel atopen una botella abandonada nel monte. Willy métese dientro pa probar el líquidu tan dulce y rico que lleva. Entós, la botella y la bola de Nel marchen a arrollicones cuesta abaxo y desapaecen en mediu’l monte. Maya y Enol nun van parar hasta atopalos.
Quiero dar les gracies a les munches persones que dende esta mañana escribistis peles redes y a les que tamién pudi ver en persona y que nos felicitastis pol doblaxe al asturianu que fiximos en Cuatro Gotes Producciones de L’Abeya Maya pa Radiotelevisión del Principado de Asturias.
Foi, ta siendo, un llabor pioneru, con toles dificultaes qu’ello supón. Sicasí tengo la suerte de tener un equipazu nel qu’hai que destacar el gran esfuerciu de Loren Armengol Santamaría y Lluis Fanjul, pero tamién el trabayu de Lluis Antón González, Carmen Menéndez, Sergio Buelga, Jennifer Berrocal Expósito, Raul Alonso Garcia, Aníbal Hannibal, Luis Nuñez, Miguel Martínez, Antonio De Benito López y más. Tamién l’asesoramientu de Normalizacion Llinguistica y la guía del equipu de RTPA.
Ah, y qué suerte, como amigu y fan declaráu, tener a Silvia Quesada poniéndo-y voz d’una forma tan guapa al cantar de la serie.Si entá nun vistis los dos primeros capítulos, equí tán. A ver qué vos paez. 
