La campaña europea ‘Blue Expedition’ esplega n’Avilés un ampliu programa para concenciar sobro la invasión de plásticos marinos. El barcu muséu ecoactivo Mater va ser el centru de les actividaes, dirixíes a escolares, families, ciudadanía y axentes marítimos, que se desenvuelven hasta’l domingu. La espedición forma parte del proyectu européu Interreg Blue Point, nel que participa’l Principáu. Actualidá/ LNE / Programa ‘Blue Expedition’
La campaña europea de sensibilización Blue Expedition, que busca frenar la invasión de plásticos nos océanos, fixo escala nel puertu d’Avilés, onde va permanecer dende güei hasta’l domingu. Mientres estos díes desenvolveráse un ampliu programa d’actividaes gratuites empobinaes a escolares, families, ciudadanía polo xeneral y profesionales del ámbitu marítimu.
La exa central d’esta iniciativa ye’l Mater, un antiguu barcu boniteru reconvertíu en muséu *ecoactivo y centru d’educación ambiental. En zarpando de Pasaia y faer escala en Santander, la embarcación llegó a Avilés p’acoyer mientres cuatro díes xuna variada programación qu’inclúi talleres, visites empuestes, recoyíes de borrafes marines, actividaes artístiques con plásticos y xuna esposición interactiva.
Ente les actividaes previstes destaca la esposición Curiando’l mar pa curiar la vida, según los talleres escolares nos que van participar más de 400 alumnos y alumnes de nueve centros educativos ente güei y mañana. Amás, van ufiertase visites empuestes al barcu y talleres familiares sol títulu Somos Guardamares, disponibles mientres tola estancia del Mater nel puertu.
La programación tamién inclúi eventos especiales. Esta tarde va celebrase la mesa redonda Un mar de soluciones: Asturies frente a los plásticos marinos. Mañana ta prevista xuna salida al mar pa esaniciar plásticos, siempres que les condiciones meteorolóxiques dexen. El sábadu pela mañana va realizase una recoyida y caracterización de borrafes na sablera de Xagó, la única actividá que rique inscripción previa al traviés del enllaz.
El domingu cerrará la escala con una creación artística a partir de borrafes marines y la llectura del Compromisu Blue Ambassadors.
La espedición forma parte del proyectu européu Interreg Blue Point, nel que participa’l Gobiernu d’Asturies. Esta iniciativa, dotada con más de 3,3 millones financiaos con fondos comuñales y aportaciones de los socios, tien como oxetivu analizar la cadena de valor del plásticu marino ya identificar nueves oportunidaes económiques sostenibles derivaes de la so xestión.
El proyectu promueve la cooperación ente cuatro rexones atlántiques —España, Francia, Irlanda y Portugal— y cuenta cola participación d’alministraciones públiques, universidaes, centros d’investigación y empreses privaes. N’España, la iniciativa ta liderada pola Diputación Foral de Gipuzkoa, cola collaboración del Principáu, l’Agrupación de Sociedaes Asturianes de Trabayu Asociáu y Economía Social (Asata), la Sociedá pal Desenvolvimientu Rexonal de Cantabria (Sodercan) y el Centru d’Investigación en Xestión Empresarial, Innovación y Emprendimiento (MIK) de la Corporación Mondragón.
