Yá ta a la venta ‘Cenicientes’ de Marisa Valle Roso en Musicasturiana.com. L’artista presenta’l discu el próximu sábadu en La Felguera, con mui poques entraes disponibles, y ye la única asturiana nel circuitu AIEenRUTa.
Yá pue mercase Cenicientes de Marisa Valle Roso na tienda online de musicasturiana.com, na so oficina de Xixón y nel espaciu que tien esti proyectu na tienda física de Puru Remangu d’Uviéu. El cuartu trabayu en solitariu de l’artista llangreana supón la so consolidación dafechu, con diez cantares qu’amesten pop, folk, canción d’autor y electrónica y que xiren alrodiu’l feminismu, la llucha pola xusticia social y la reivindicación de la memoria colectiva asturiana, amás d’otres cuestiones más personales.
El próximu sábadu 18 d’ochobre a les 20h el Nuevu Teatru de La Felguera va acoyer l’estrenu de Cenicientes enriba l’escenariu y yá queden mui poques entraes a la venta. Esti conciertu va ser l’arranque d’una xira que va llevar a Valle Roso per tola península ibérica, más tovía agora que ta acabante d’anunciase que va ser la única artista asturiana que forme parte de la edición d’esti añu del circuitu AIEnRUTa-Artistas. Una proyección per fuera d’Asturies que ta espardiéndose, como tamién amuesa que’l pasáu llunes participó na entrega de premios de la gala +Músicas, entidá que puxa por promover el talentu de les muyeres na música. Non concedió tamién gallardones; recibiólos tamién, porque esti llunes el diariu El Comercio concedio-y el premiu Cultura 2025.
Cenicientes fórmenlo diez cantares qu’entemecen el folk con el pop y los instrumentos electrónicos qu’apaecen na gran mayoría de los sos temes, asitiando esta obra nueva en dalgo innovador y fresco pa la música de l’artista, pero tamién d’Asturies. D’esta manera, Marisa Valle Roso canta a les muyeres del carbón o al Tren de la Llibertá, pero tamién afonda no más personal, dedicando’l so espaciu a la salú mental, el gran problema de la sociedá del sieglu XXI. En definitiva, un cantu al feminismu, la llucha pola xusticia social, la reivindicación de la memoria colectiva asturiana y de la so identidá. Too ello failo cola ayuda del productor Juan de Dios, nomináu en delles ocasiones nos Latin Grammys
Procesu creativu llargu
Esti álbum, qu’entamó a crease va un par d’años tuvo un procesu llargu y nel que l’artista «nun llograba escribir cantares» que la representaren hasta qu’entamó a «observar lo qu’asocedía al rodiu» d’ella. Asina, centróse na identidá y lo que fixo moldiar la de so: la so hestoria, la tierra na que vive y les muyes que viven nella. El primer tema que surdió foi ‘Cenicientes del carbón’, y precisamente elles dieron nome al discu y al restu de les hestories que lo conformen: «muyeres», reivindica. Ye, precisamente’l símbolu de la llucha, el zapatu d’Anita Sirgo, lo que da imaxe a tol álbum.
L’artista llangreana vien dende’l mes de febreru asoleyando hasta 7 de los temes que componen esti discu y agora, cola so espublización, apaecen trés cantares más nos qu’hai «esperimentación col foclor, nuevos ritmos y un cantar inspiráu na tradición oral asturiana que lleva por nome ‘La tormenta’», desplica. Amás, destaca como «un verdaderu regalu de la vida poder conocer a la informante ya incluyila nel videoclip del cantar gracies al trabayu de Xosé Ambas y Ramses Ilesies».
Marisa Valle Roso, una de les voces más singulares
Autora ya intérprete de la so propia hestoria, la so carrera empecipia na tonada asturiana, disciplina que marcó los sos primeros discos y valió-y reconocencies como’l premiu al Meyor Cantar Asturianu del Añu o’l Premiu de la Crítica RTPA. La so proyección nel estáu afítase cuando en 2014 ye convidada por Víctor Manuel a la so xira 50 años es nada, compartiendo escenariu con figures como Silvia Pérez Cruz, Jorge Drexler, Joaquín Sabina o Estopa.
Con una esmolición artística constante, Marisa esploró distintos xéneros y sonoridaes, como amuesa nel discu Consciente (2017), con collaboraciones de Rozalén y Víctor Manuel, y premiáu col Premiu AMAS al Meyor Cantar Folk. En 2022 llanza Lo Fugaz, el so primer trabayu íntegramente como compositora, onde la lletrónica y los tintes pop s’entemecen col folclor, ampliando’l so universu sonoru y poéticu.
En 2023 foi nominada al Premiu Camaretá al Meyor Cantar por ‘Tonada’, y en 2024 punxo música al documental Dans les Asturies, les mines ont uni les hommes, una producción cultural d’Arte.tv. Esi mesmu añu participó nel nuevu himnu Asturias de Víctor Manuel, con artistes como Nacho Vegas, Leticia Baselgas y Chus Pedro, nuna producción de RTPA con Paco Loco.
