https://www.instagram.com/p/DAS7c9hM-8K
TPA emite esti domingu la gala d’entrega del galardón. La música conceptual de Ferla Megía fíxose anueche col Premiu Camaretá al Meyor Cantar, al que tamién optaben Héctor Braga, Herbamora y Llibre. El premiu, convocáu pol Principáu para reconocer la creación musical n’asturianu, ta dotáu con 6.000 euros. TPA emite esti domingu a les 21:50 la gala d’entrega del galardón. Musicasturiana.com / https://www.instagram.com/ferlame
«Quémala guah.e» ye la frase que meyor resume la gala del XVII Premiu Camaretá al Meyor Cantar. Estes pallabres de Los Berrones na versión que faen de ‘La Moto Pachín’ nel discu Xentiquina Crew y que Ferla Megía samplea en ‘Xatu‘ fixeron que’l Teatru Vital Aza de L.lena amburara y, con ello, el xoven músicu algamara’l gallardón a la meyor canción n’asturianu d’esta convocatoria.
Too ello nuna tarde que reflexó’l bon momentu que vive la música’l país, yá que tolos otros artistes y cantares nominaos -‘Valiente‘ d’Héctor Braga, ‘Eclipse total‘ d’Herbamora y ‘L’Ablugada‘ de Lïbre– amosaron una grandísima calidá en cuantes a composición y interpretación en directo.
Nel so agradecimientu, Megía tuvo unos pallabres pa los demás concursantes, pa los sos pas y collacios -que tuvieron sofitándolu dende la primer fila- y agradeció un premiu que-y da puxu nel so llabor camín de la profesionalización como músicu, tres de llevar con una guitarra na mano dende los 17 años.
L’actriz y performer Mariajo Baudot y l’actor Félix Corcuera foron los responsables de guiar esta gala qu’aportó con novedaes. El formatu de presentación foi muncho más desenfadáu que n’anteriores ocasiones, col usu del humor y la interpretación teatral per parte de los presentadores a lo llargo de tol certame. Per otru llau, a cuenta d’un cambiu de fecha nel día programáu, l’escenariu nun foi’l Teatru La Llaboral de Xixón y treslladóse al Vital Aza de La Pola; daqué que causó qu’a nivel artísticu’l resultáu fuera peor, por mor de que les lluces blanques tuvieron prendíes durante tol espectáculu -a cuenta de la grabación pa la TPA que s’emite esti domingu pela nueche- y torgó qu’una iluminación afayadiza de les actuaciones fixera qu’estes ganaren tovía más en calidá.
Mentanto l’actuación de La Bonturné, cada miembru del xuráu -formáu pola música y periodista Alicia Álvarez; el periodista y xestor cultural Xicu Ariza; la técnica en normalización llingüística Penélope Miranda; la música y filóloga Andrea Joglar; y la docente d’asturianu y panderetera Emma Posada-, puntuó del 1 al 4 a caún de los cantares finalistes; unos temes mui estremaos en cuantes a estilu y propuesta escénica que fixeron mui complicada la votación, porque cualquiera podía ser ganador. ‘Xatu’ foi’l más puntuáu y los componentes de La Bonturné xunto a la conseyera de Cultura, Política Llingüística y Deporte, Vanesa Gutiérrez, dieron-y a Ferla Megía la estatua d’un gallardón que tamién inclúi 6.000 euros en metálicu, la realización d’un videoclip y participar dientro del circuitu Autores nel Camín.
