«Fondures» ye un poemariu mineru con güeyos de nietu, biznietu y tataranietu de mineru. Con güeyos del nuesu tiempu que mira al ayeri, al güei y al mañana d’una mina a la que nunca baxé, pero onde dende siempres tuvi.
La mina taba, y ta, nes conversaciones de la mio casa, nes espresiones, na forma d’entender la vida. «Fondures» ye un poemariu que s’escribió a poco fueu y col corazón.
Na semeya ta la ḷḷámpara del mio güelu Dionisio, el que me punxo nome y el que siempres en vida y dempués d’ella significó pa mi la mina y el so sufrimientu.
Dambos, el mio güelu y la so ḷḷámpara, tienen el so sitiu nos versos del poemariu. Tenía qu’escribilo y yá lo fixi. Espero qu’onde tea, él tea siquier un pocu de lo arguyoso que toi yo de ser el so nietu; el nietu d’un mineru.
