La Ciudá nel Mar asoleya’l videoclip de ‘Lluminaria’. Raúl Alonso estrénase como realizador audiovisual con esta obra que yá algamó dos nominaciones en festivales d’esti xéneru. Musicasturiana.com
Pasaron dos selmanes dende que La Ciudá nel Mar llanzó’l so primer EP, Lluminaria, y el cuartetu folk-indie-canción d’autora sigue dando novedaes. La última ye l’estrenu del videoclip del tema que da nome a esi trabayu ‘Lluminaria’, una obra fecha por Raúl Alonso, que s’estrena como realizador audiovisual musical. Amás el clip tuvo yá dos nominaciones en festivales: nel II Concursu de Videoclips grabaos nel mediu rural del Mediu Güeyu Festival y nel VI Festival Internacional de Videoclips de Oviedo (FIVO).
«El trabayu surdió tres d’una conversación con Marina Pangua, la cantante de la banda. Teníemos dellos cantares posibles, pero a la fin escoyimos ‘Lluminaria’ porque tenía una lletra más visual y con una hestoria guapa de narrar audiovisualmente«, desplica Raúl Alonso sobre la creación. Amás, comenta que «la inspiración» foi colectiva ente banda y realizador: «Trabayamos a comuña pa crear un rellatu guapu y que caltuviera la esencia del cantar, buscando tresmitir esa sensación de misteriu que tien la propia lletra».
Tamién ye esti’l primer videoclip que fai «de manera íntegra» esti escritor, xestor cultural periodista -collaborador de MUSICASTURIANA.COM y anguaño codirector del Semando Fest- y la so intención «ye siguir faciendo más obres d’esti tipu y dir ameyorando tanto la calidá visual como la narración de les hestories».
