Sábadu 13 d’avientu, de 12.00 a 18.00 hores / La Benéfica de Piloña, L’Infiestu
Un espaciu d’espresión artesana, un territoriu onde lo manual vuélvese ritual y les manos coreografían con lentitú les pieces, ferramientes o l’alimentu. Lluz, soníu, materia, alma.
Una orquesta d’oficios convócase: llana y testil, gastronomía y plantes, fierro y blima, cerámica y macramé, oficios que s’entreteen y enrieden proxectando les nueses sabiduríes ancestrales.
Una instalación sonora, goliosa, sabrosa. Un filo conduz el filo.
Ambiente performativo irradia del coru d’escenes creáu especialmente para La Benéfica.
N’una dómina onde’l productu y la rapidez de la compra intensifícase apelamos a la contemplación y la degustación d’entender les materies primes qu’envolubren el mundu.
Acciones máxiques que remanecen d’orixenes vexetales, animales, minerales, un universu cardáu, la constelación de remover l’arroz con lleche, un diálogu con oveyes, el baille del escanciáu, una orquesta de metales: cúntame lo lento que trabayes, faime entender lo cíclico de la vida nun mazapan. Desanudame p’anoyar, vengo cola teoría del caos a travesar la seronda, amasa la folla pa emocioname, calecer y esfrecese na to llana. En tiempos de máquines, humanizamos la tenrura de los saberes.
Llana, madera, testil, quesos, cestería, cerámica, sidra, forxa y alimentación artesanal… /
les pieces quieren volver a los sos oríxenes: la lleche revuélvese / los nuedos ordénense / la blima xunise / la llana ser fuerte / el filo ser abrigu/ el polvu convertise n’alimentu / les plantes curianos / el fierro fundise / la madera será madreña / la mazana faese fonte
Artesanía que s’escucha, que s’esplega y alienda.
Una invitación a mirar de barganal lo que naz de les manos, del cuerpu y de la maxa del tiempu. Una esperiencia onde lo cotidiano vuélvese actu poéticu. Rebelión de la observación, en tiempos de prieses: fragües lentes.
