Yá ta la maquinaria encesa pa recibir el que va ser el tercer trabayu discográficu de llarga duración de Rodrigo Cuevas. Un día dempués d’asoleyar el primer single d’adelantu, ‘Un mundo feliz’, que cunta cola collaboración de Massiel, el «ministru de verbenes» anuncia les ocho primeres feches de la so próxima xira La Belleza. El 24 d’abril n’Avilés y el 21 de setiembre n’Uviéu, dientro de San Mateo, son les primeres cites anunciaes n’Asturies.
El 3 d’ochobre de 2024 remató la xira La Romería, qu’acompañó al aclamáu discu Manual de Romería. D’entós pacá Rodrigo Cuevas nun volvió a xubir a los escenarios acompañáu de la so banda -sí que lo fizo en solitario, pa sofitar delles iniciatives de calter social como’l conciertu solidariu por Palestina o’l 40 aniversariu de Radio Kras-; y tuvo trabayando no que va ser el so próximu discu y espectáculu.
L’adelantu del so tercer álbum ye ‘Un mundo feliz‘, un tema con dalguna pallabra n’asturianu col que l’axitador cultural presenta un mundu alternativu; muncho más llibre y prestosu y nel que, ente les munches coses poles que nagua l’artista nél, reivindica que «la xente fala n’asturianu, ye la llingua oficial«. Xunto a él pon voz, Massiel, histórica de la música española retirada de los escenarios dende 2013 y que nesta edición del FICX recoyó un gallardón n’homenaxe a la so trayectoria cantando xunto a Cuevas nun Teatru Xovellanos enllenu.
