Salú propón mazcarines obligatories en centros sanitarios cuando haya picos de contaxu.
Los niveles de riesgu mídense con indicadores como la tasa d’incidencia, hospitalizaciones, ocupación de cames o ingresos n’UCI.
El plan de midíes escontra los virus respiratorios 2025 recupera la mazcarina en centros sanitarios, que pasará de recomendada a obligatoria nos peores momentos de contaxos, y aconseya la reubicación o baxa de los trabayadores de residencies y el refuerzu del teletrabayu.
El protocolu de recomendaciones pal control de les infecciones respiratories agudes que debatirá mañana la Comisión de Salú Pública, al que tuvo accesu EFE, ye n’esencia’l mesmu que’l Ministeriu de Sanidá intentó poner en marcha, ensin éxitu, la temporada pasada, con cuatro escenarios de riesgu y una serie de midíes asociaes a caún.
La so intención ye «facilitar la coordinación» y homoxeneizar actuaciones en tol territoriu, «independientemente de que cada comunidá o ciudá autónoma afite tantes midíes complementaries como considere afayadices».
Los niveles de riesgu mídense con indicadores como la tasa d’incidencia, hospitalizaciones, ocupación de cames o ingresos n’UCI, ente otros, que se saquen del Sistema de Vixilancia de les Infecciones Respiratories Agudes (SiVIRA), del rexistru de incapacidaes temporales (IT); del agua residual; el sistema de monitorización de la mortalidá diaria (MoMo); el d’Información de Vacunaciones (SIVAMIN) y la información autonómica de capacidá asistencial y ocupación hospitalaria.
La incidencia del gripe disparóse anguaño n’España antes de los previstu, obligando al Ministeriu de Sanidá a alcordar coles comunidaes autónomes un protocolu común d’actuación qu’apuesta pola recuperación del usu del mázcaru en centros sanitarios y de persones mayores. N’Asturies, la incidencia doblóse na última selmana, según informó esta tarde la conseyera de Salú, Concepción Saavedra, pasando de 37,4 en 63,4 casos por cada 100.000 habitantes.
«El subtipo tipu ‘K’ qu’había per Asturies y otres zones, que tenía una trasmisión más elevada, estabilizóse y los casos vuelven ser mayoritariamente de gripe normal. Sicasí, dícennos que’l picu seldrá en dos selmanes, pa navidaes», esplicó Saavedra.
