El festival de música moza n’asturianu Semando Fest ta acabante d’anunciar la imaxe oficial pa la próxima edición, un diseñu realizáu per Sierra Graphics 
Con esto arranca formalmente la promoción d’esta nueva edición del festival, qu’aspira a siguir siendo una plataforma de referencia pa la música moza n’asturianu y qu’esti añu ta organizada pol proyectu cultural mozu Héroes ensin nome. MUSICASTURIANA.COM
El nuevu llogotipu, diseñáu por Sierra Graphics, representa l’espíritu xoven, creativu y renovador del festival — una imaxe que busca entemecer tradición y modernidá, como lo fixo Semando Fest dende la so nacencia. Esta renovación visual vien a reforzar la identidá del festival y constitúi una marca reconocible que va presidir toles pieces de comunicación de la edición. Con esta decisión, la organización reafirma’l compromisu contínuu col apoyu a la música moza en asturianu y col fomentu de la escena emerxente.
Andrea Sierra (Xixón, 1992) ye la cara visible de Sierra Graphics. Ye diseñadora gráfica especializada en branding, videu, redes sociales. Apasionada del mundu del emprendimientu y si te despistes va intentar convencete de qu’empieces el to propiu negociu. Imparte formaciones y mentoríes dende un enfoque realista pa que consigas tener una marca coherente y sostenible al llargu plazu.
D’otra banda, yá ta too zarrao pa esta cuarta edición del festival: grupos, cartelería, realización audiovisual y presentadores. Nes próximes selmanes van dir anunciándose los nomes de los distintos axentes implicaos nun eventu que busca ser más qu’un conciertu y por eso tien una filosofía caracterizada por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’una actuación; que reivindica les sales de conciertos como un espaciu afayadizu pal exposigue de la música de raigañu; y qu’apuesta por da-y oportunidaes a les y los creadores xóvenes.
La iniciativa nació en 2023 y nella participaron el dúu d’asturianada Alicia Villanueva y Luis Álvarez Pola; el tríu de folk de cámara Loína; les pandereteres Algaire y el dúu d’electrónica de raigañu Llevólu’l Sumiciu. Cecilia Díaz foi l’autora del cartelu y la identidá visual, mientres que les semeyes y el videu resume del eventu fueron obra de Lucía Garó. Yedra Riesgo y Raúl Alonso –responsables del programa radiofónicu Héroes Ensin Nome– fueron los encargaos de presentar l’eventu.
En 2024 xubieron al escenariu Sandra Álvarez y Noemí González col so espectáculu de poesía feminista y tonada -qu’anguaño preséntase como Milfueyes-; Mostru l’Horru col so rap combativu; la banda de folk celta Guieldu y el grupu de punk-rock Ochobre. Beatriz Menéndez –alter ego de Made in Chigre– foi la responsable de tola parte gráfica y Leticia Cernuda de les semeyes y del videu. Héroes Ensin Nome repitieron como presentadores.
Yá en 2025, foi’l turnu nel escenariu pa la percusión y les voces d’Abéu, la propuesta novedosa con una montonera de xéneros estremaos de Ferla Megía, el power folk d’Alienda nel so décimu aniversariu nos escenarios magar de la so mocedá y la banda de post-rock Melandru. L’artista Surimi, –nomatu de Paula Suárez– encargóse de la identidá visual, mientres que Nay Semeya fixo lo propio coles semeyes y la realización audiovisual. Héroes ensin nome repitieron na presentación.
