- Esta obra ta disponible pa la so descarga gratuita na web https://politicallinguistica.asturias.es/
La Conseyería de Cultura, Política Llingüística y Deporte editó a últimos del 2025 el Diccionariu de la mazana, el pumar y la sidra, con refranes y espresiones populares sobre elles, una obra del escritor y filólogu Xuan Xosé Sánchez Vicente qu’axunta nun centenar de páxines el léxicu tradicional asociáu a la mazana, al cultivu de los pumares y a los procesos d’ellaboración de la sidra.
La obra incorpora un repertoriu ampliu de variedaes de mazana, más d’un centenar d’elles documentaes y, nos más de los casos, vinculaes a la Denominación d’Orixe Protexida Sidra d’Asturies. A lo llargo del volume inclúyense tamién descripciones detallaes de los instrumentos, les técniques y los procedimientos propios del llagar, dende que se maya la mazana hasta que s’echa la sidra, mostrando la complexidá d’un saber facer tresmitíu a lo llargo de xeneraciones.
El llibru recueye amás un vocabulariu estensu de los oficios qu’históricamente dieron forma al ciclu sidreru y que güei formen parte de la memoria cultural del territoriu. A ello súmase un conxuntu de refranes, espresiones y fórmules tradicionales que reflexen la visión cultural, social y simbólica de la sidra na vida de caldía d’Asturies, contribuyendo a mostrar cómo esta bebida articula identidaes, rellaciones y maneres d’entender el paisaxe.
Con una tirada inicial de 2.500 exemplares, la conseyería va distribuyir la obra nos principales equipamientos culturales del Principáu, amás de n’espacios vinculaos a la cultura sidrera, y tamién pue descargase en formatu pdf nel catálogu bibliográficu d’esta páxina web o directamente nesti enllaz:
