Ferla Megía, nueva confirmación asturiana pal Festival Interceltique de Lorient. L’artista vanguardista toca nel festival celta más prestixosu, nel que tamién van actuar Rubén Alba y los ganadores del II Premiu «La Busdonga». Musicasturiana.com
A finales de payares el Festival Intercélticu de Lorient fizo’l primer avance de programación de la so próxima edición y yá anunciaba l’actuación del gaiteru Rubén Alba; va una selmana anuncíabase que los ganadores del II Premiu Obdulia Álvarez «La Busdonga» d’Asturianada –Alicia Villanueva, Néstor Díaz y Esteban Verdeja– van formar parte de la delegación asturiana; y agora’l festival más prestixosu del mundu celta adelanta que tamién Ferla Megía va formar parte de la programación oficial del certame.
Del 31 de xunetu al 9 d’agostu, la llocalidá bretona de Lorient va acoyer la 55 edición del Festival Interceltique, qu’esti añu va tar dedicáu a Cornualles. Asturies siempre ta bien presente nesti eventu y nesta edición suma a una de les propuestes más vanguardistes de la música’l país, la de Ferla Megía. Música tradicional, rap, ambient, pop, electrónica… suenen nes composiciones d’esti xoven músicu sierense. Con dos trabayos publicaos, Páxaros 01 y Páxaros 02, foi’l ganador el pasáu añu del XVII Premiu Camaretá al Meyor Cantar n’asturianu.
