‘Gaiteros del carbón’ cumple 10 años y celébralos con un conciertu acompañaos de grandes artistes. Víctor Manuel, Nuberu, Marisa Valle Roso o Celtas Cortos van tar el 10 de xineru en La Felguera. RTPA
Irene Álvarez ye una Gaitera del Carbón y agora, con 15 años, va celebrar una década nesta banda nel mesmu escenariu qu’artistes a los que, a pesar de la so mocedá, considera referentes.
‘Gaiteros del carbón’ surdió na Cabalgata de Reis de Llaviana fai agora 10 años y con alumnos de música tradicional como Irene qu’entós tenía 5.
El proyectu cuayó, la banda ye yá reconocible y va intentar dar un pasu más col conciertu de La Felguera nel que van tar Dixebra, Nuberu, Víctor Manuel, Hevia, Marisa Valle Roso y Celtas Cortos con quien yá se xubieron al escenariu en San Mateo en 2018 señala Pablo Carrera, director de ‘Gaiteros del Carbón’.
Les entraes tán escosaes pero la fórmula de Gaiteros del Carbón non; funciona y tien relevu, daqué importante si falamos de música tradicional.
Gaiteros del Carbón anuncia que yá agotó les entraes de los dos pases pal conciertu X Aniversariu que van facer el 10 de xineru nel Teatru José León Delestal de La Felguera (Llangréu).
La banda de gaites de les cuenques mineres Gaiteros del Carbón van festexar con munchu puxu los sos diez primeros años de camín. Tres d’algamar una exitosa campaña de crowdfunding pa financiar los actos del X Aniversariu y d’agotar toles entraes en malpenes una selmana pal pase de les 20.30h; yá vendieron too pal segundu pase que van dar a les 17.30h d’esi 10 de xineru. Nel espectáculu van collaborar artistes pernomaos: Hevia, Nuberu, José Manuel Tejedor, Xune Elipe (Dixebra), Marisa Valle Roso, Víctor Manuel y Celtas Cortos. Amás, tamién van tar acompañaos por trés músicos asturianos de reconocíu prestixu: Rubén Bada (guitarres), Juanjo Díaz (batería y percusiones) y Ramón Prada (teclaos y baxu), que se va encargar, xunto col director de la banda Pablo Carrera, de los arreglos y la dirección musical.
