¿Qué significó y qué significa güei el maíz para la nuesa tierra? Nel pasáu, el maíz foi sustentu, memoria y comunidá. Yera l’alimentu que xunía a les families, marcaba’l ritmu del trabayu nel campu y daba soberanía al pueblu . Cada panoya recoyida yera frutu del esfuerzu compartíu, del cuidu de la tierra y del cuidu mutuu ente persones, animales y redolada.
Güei, el maíz sigue bien vivu na nuesa hestoria cotidiana. Cultívase pa faer pan, papes y empanaes; alimenta a les pites, sostien a les vaques de lleche y forma parte del ciclu que caltien la vida nel campu. Nun ye solo un cultivu: ye economía doméstica, soberanía alimentaria y conocencia tresmitida de xeneración en xeneración.
Pero’l maíz tamién ye presente social. Ye motivu d’alcuentru, de celebración y de creación colectiva. En Maixeira, el maíz conviértese n’escusa p’axuntanos, pa recuperar oficios tradicionales, compartir saberes, esfrutar del arte, la música y la cultura que nacen d’esta tierra y que siguen evolucionando.
Y ¿qué significa güei el maíz na nuesa tierra?
Cuéntanos la to hestoria, la to alcordanza, la to receta o vínculo con él.
