Autora AMANDA MORIYÓN / Testu LETICIA SÁNCHEZ
La tercera portada del añu rinde homenaxe a Armando Palacio Valdés, una de les figures más destacaes de la lliteratura asturiana. Nacíu en Entrialgo (Llaviana) en 1853, la so vida trescurrió ente Avilés, Uviéu y Madrid, anque’l paisaxe preindustrial de la cuenca del Nalón marcó fondamente la so obra. Esta redolada rural foi la principal fonte d’inspiración de L’aldega perdida (1903), la so novela más conocida y xuna reflexón premonitoria sobro los efectos negativos de la industrialización.
Na obra, Palacio Valdés contrapone l’agricultura y la minería como fuerces irreconciliables, amosando cómo la llegada de los mineros alteria l’harmonía del mundu rural. La novela establez un claru paralelismu cola mitoloxía griega al oldear l’Asturies rural cola Arcadia, un espaciu bucólicu ya idealizáu, remembrada dende’l so entamu cola espresión llatina Et in Arcadia ego. Al traviés d’una mirada murnia, l’autor retrata la vida de los habitantes de Llaviana a finales del sieglu XIX y denuncia la perda de valores tradicionales frente a la meyora del progresu.
L’aldega perdida tesciende’l rexonalismu pa convertise nuna fonda reflexón social y cultural sobro’l preciu del desenvolvimientu, antemanando alderiques que marcaríen el sieglu XX. La reconocencia oficial a la trayectoria de Palacio Valdés llegó en 1906 col so ingresu na Real Academia Española.
Amanda Moriyón Rodríguez @amanda_moriyon_arte ye una estudiante llavianesa d’Hestoria del Arte, actividá que compaxina cola ilustración y la creación artística. La so obra xira en redol a la vida rural asturiana, les sos tradiciones, el so imaxinariu colectivu y les persones que la caltuvieron viva. Al traviés de les sos ilustraciones, busca prindar la esencia del territoriu y reinterpretarla dende un llinguaxe contemporaneu, dialogando con una dómina marcada pol cambéu constante.
En tierres de Llaviana la vida trescurre felizmente ente les xeres cotidianes del campu y les romeríes, equí surde l’amor entre Nolo y Demetria y tamién el de Xacintu y Flora. Toa esta paz y tranquilidá vese enturbiada pola apaición de la minería qu’anque munchos crean que va traer consigo la civilización y el dineru tamién-yos traerá la violencia. Nolo y Demetria esfruten de los sos alcuentros nes romeríes,anque estes siempres acaben n’engarradielles constantes ente los mozos d’Entrialgo y los de Llorío, pero nun van tener mayor transcendencia por ser estes a palos o pedraes, pero cola industrialización lleguen unos mineros que camuden estos poles navayes y les pistoles, son violentos y asedian a les moces del llugar ensin nengún miramientu.
Metanes tou esto ciertu día llega la lexítima madre de Demetria a buscala pa lleva-y la a vivir con ella a Uviéu, pero Demetria nun s’acostuma a aquella vida y ciertu dìa que Nolo va visitar pola feria de l’Ascensión escapar con él pa volver a Entrialgo. Per otra parte D. Félix el capitán, ricu terrateniente nun ve con bonos güeyos que les mines tean destruyendo les tierres y la so idílica forma de vida, va ver como parte de les sos tierres van ser espropiaes al nun quereles vender. Dos díes antes de la Fiesta del Carmen celebren les bodes entre Nolo y Demetria y Xacintu y Flora, por esti motivu’l día de la romería’l capitán convida a toos a una gran fiesta, pero a la llegada a la ilesia españa xuna encarnizada llucha ente los mozos del llugar y los mineros qu’acaba cola muerte de Xacintu y Demetria.
Armando Palacio Valdés: wiki /
Teatru Palacio Valdés, n’Avilés
