Musicasturiana.com / Esti sábadu ye’l Día Internacional de la Llingua Materna y, como ye vezu dende va unos años, el gobiernu asturianu entama delles actividaes pa festexalo. Artes escéniques, música, talleres, actividaes dixitales educatives y un actu institucional dan forma a una programación que va desenvolvese en Piloña, Carreño, Xixón, Grau, Ribeseya, Ayer y Samartín del Rei Aurelio. La música va tar presente coles actuaciones de David Varela y Xiranda Brass Band.
Esti vienres 20 a les doce la mañana l’Auditoriu de Grau acueye El Conciertín, conciertu didácticu de música tradicional que va poner David Varela. El multiinstrumentista xixonés aporta a la villa moscona pa facer esta actuación esclusiva pa escolinos y escolines de Grau, Candamu y Salas. La programación musicale complétase col conciertu que Xiranda Brass -formación surdida al rodiu la Banda Gaites Xiranda y qu’axunta vientos metales, percusión y gaites- va dar nel Centru Cultural de Morea (Ayer) el sábadu 21 a les 20h.
L’actu institucional de la celebración va ser el miércoles 25 de febreru nel Aula Cultural Onofre Rojo de Sotrondio (Samartín del Rei Aurelio), baxo’l lema Toles nuestres voces, un alcuentru que va poner en valor la importancia social, educativa y comunitaria de la llingua asturiana. Nél van participar representantes autonómicos y municipales, amás de centros educativos del conceyu.
Rede territorial
«La iniciativa reforcia’l compromisu institucional cola protección, promoción y tresmisión interxeneracional de les llingües propies de la comunidá autónoma, en consonancia coles directrices internacionales sobre diversidá llingüística y cultural», declararon dende’l gobiernu asturianu nuna nota de prensa. Nella despliquen amás qu’estos actos «intégrense nuna axenda conxunta impulsada pol Executivu asturianu al traviés de les conseyeríes de Cultura, Política Llingüística y Deporte y d’Educación, con entidaes locales y centros educativos, promoviendo una rede territorial qu’avera’l valor de les llingües propies a públicos mui diversos»
