Aporta l’Antroxu y con él delles cites cola música’l país en Xixón, Siero, Bimenes, Quirós y Piloña. Hai conciertos de Rollu Folk, David Varela, L’Andecha Turcipié, Cancios de Chigre, Jam Sesion de pandereta y Nueche en Danza. Musicasturiana.com
Esti xueves 12 entamen les celebraciones d’Antroxu que se van esparder per tol país a lo llargo los próximos díes. La música asturiana ta davezu presente en dalgunos de los eventos entamaos y anguaño hai cinco programaciones anunciaes nes que va sonar: Rollu Folk dan un conciertu en Xixón, en Siero ye’l XIX Certame de Cancios de Chigre, en Bimenes hai una jam de pandereta, David Varela actúa en Quirós y La Benéfica de Piloña entama l’Antroxu en Danza.
La primer de les cites ye esta tarde a les 19h nel Nuevo Llagar de Noriega de Xixón, onde van actuar el quintentu de música tradicional pal baille Rollu Folk. Al otru día, coincidiendo cola celebración polesa del vienres de Comadrines, quince llocales acueyen dende les 21h el XIX Certame de Cancios de Chigre. Yá pal sábadu la Casa de les Radios de Bimenes entama a les 12.30h una Live Pande Session participativa na que va haber pandereta, antroxu y callos; y pal domingu David Varela va ser el «mayestru de cerimonia» de los cantares de chigre y frixuelada qu’organiza La Pimpana de Quirós dende les 17.30h.
Les programaciones anunciaes hasta la fecha complétense col Antroxu en Danza de La Benéfica na que, ente les distintes actividaes, actúen al vermú L’Andecha Turcipié, a les 19.30h ye la Nueche en Danza y a les 23h toquen Dúo Impresión.
Siero, Uviéu y Llanera protagonicen l’axenda musical del fin de selmana
Vienres 13 de febreru
XIX Certamen Cancios de Chigre en Siero
La Pola Siero (Siero) | 21:00
Un certame que busca recuperar l’espíritu de les tertulies musicales alredor de la sidra y la canción popular nel centru de La Pola.
Sábadu 14 de febreru
Ferla Megía n’Uviéu
Puru Remangu, C. del Postigu Baxu, 1 (Uviéu) | 13:00
Ferla Megía presenta’l vinilu de ‘Páxaros 01’ y ‘Páxaros 02’ con un showcase nel que va tar acompañáu de Tania Pereira y Rita Ojangueren.
Domingu 15 de febreru
XIV Concursu de Canción Asturiana Conceyu Siero (eliminatories)
CPI Llugones, C. de Leopoldo Lugones, 31 (Siero) | 11:30
Continúen les eliminatories d’esta veterana competición d’asturianada que se celebra tolos domingos hasta abril nel Auditoriu del CPI Llugones y nel Teatru Auditoriu de La Pola.
Martes 17 de febreru
Xiranda Brass Band
Casa de Cultura de Posada, Av. Prudencio González, 10, Posada (Llanera) | 18:30
Xiranda Brass Band ye una banda de música de cai qu’amiesta metales, percusión y gaites.
