Musicasturiana.com crea la playlist ‘Esto ye: Los Berrones’. La mítica banda de rock rural ye la novena incorporación a les llistes de reproducción dedicaes a los artistes más pernomaos de la música’l país. Musicasturiana.com
Playlists ‘Esto ye’
Con esta publicación continuamos la estaya de playlists nel nuestru perfil de Spotify. Inspirándonos nes This Is: que la plataforma musical sueca dedica a artistes de renome, Musicasturiana.com facemos lo propio centrándonos nos cantares de los grupos más destacaos de la música’l país. Esto ye: Dixebra, Esto ye: Llan de Cubel, Esto ye: Mariluz Cristóbal Caunedo, Esto ye: Nuberu, Esto ye: Muyeres, Esto ye: Nacho Vegas, Esto ye: Felpeyu, y Esto ye: L-R; foron les anteriores incorporaciones. La escoyeta musical d’estes playlists nun respuenden namás a criterios algorítmicos o a los temes más populares de cada formación, sinón que ye una selección fecha cola esperiencia de la persona responsable d’editar cada playlist.
«Los Berrones son un fenómeno como una tormenta de verano. Intensa pero que pasa enseguida». Ye una frase d’una crónica sobre un conciertu de la banda de Tolivia qu’espublizó un periódicu asturianu y que nun escaez Olegario Méndez, baxista del grupu. Evidentemente, y por suerte pa la música del país, aquel cronista nun acertó naquella predicción meteomusical.
Con cuatro décades a recostines, Los Berrones son la banda más mítica y más auténtica d’Asturies y parte d’Europa. Nun habrá munchos grupos onde los más de los sos miembros, aparte de ser escelentes músicos, saben catar una vaca. Cuidáu con eso.
Volviendo al comentariu inicial, el grupu foi a superar esa espectativa de caltenese o non nel tiempu qu’hai que reconocer que nun ye fácil. Cuántes bandes vimos, en cualquier escena y país, pegar un petardazu per dos años y desapaecer. Ser incapaces de resistir a la maldición del single que suena en toles radios y que nengún cantar posterior pudo superar.
Pudo pasa-yos a los llavianeses col ‘Nun yes tu’, el single más vendíu de la historia de la música n’Asturies, y que depués espublizaron nos dos primeros llarga duración Voy dicítelo (1989) y Si rompe que rompa (1990). Pero, claro, anque nun haya persona n’Asturies mayor d’edá que nun sepa cantala del empiezu hasta’l final puede ocurrir lo mesmo con ‘Chacho’, ‘La de les vacaciones’, ‘La del estudiante’, ‘La de Sindo’l cabreru’ o ‘La de la escuela’.
La gran pena pa les xeneraciones nueves ye qu’esos dos primeros discos, y el terceru llamáu ¿Lo tuyo cómo ye? (1993), nun pueden sentise nes plataformes dixitales. Supongo que cuestiones de derechos y discográfiques. Ye buena pena porque, pesie a que’l discu Diez años berrando (1999) recueye versiones nueves de los clásicos, dexa a munchos temazos pocos conocíos namás en manes de los que tenemos la discografía orixinal.
Cola banda en plena forma y con discu nuevu debaxo del brazu, Ta too podre (2025), ún yá ta naguando por topalos en cualquier romería o festival y cantar al altu la lleva… «Berraba, berraba, berraba, beeeeeeeeeeeeeeeeee… turullando de dolor».
