ANUARIU DE LA MÚSICA ASTURIANA 2025 Esta selmana entama la distribución d’esta publicación que repasa a lo llargo de 124 páxines tolo que dio de si la escena’l pasáu añu. Musicasturiana.com
L’Anuariu de la Música Asturiana llega un añu más fiel a la so cita per estes feches y failo con un repasu fondu a lo que dio de sí’l pasáu 2025. Como de costume les temátiques d’esta publicación editada por Goxe Producciones céntrense n’estilos como la música tradicional, el folk, el rock o la canción d’autor, con secciones qu’inclúin reportaxes, informes, entrevistes, crítiques, opinión, recoyida de material o anuncies. Yá pue lleese la versión dixital en Musicasturiana.com y a a lo llargo d’esta selmana van repartise los exemplares gratuitos nos puntos de distribución habituales.
L’Editorial, nesta ocasión, titúlase «Música asturiana viva y en vivo» y nél fálase de la importancia de los festivales medianos y pequeños, xeneralmente autoxestionaos, que se desarrollen a lo llargo de la xeografía asturiana, armando una rede de cites cola música fecha equí imprescindible pa la so promoción y afitamientu; nesti sen, manifiéstase: «A l’alministración pública asturiana correspuénde-y apoyar decididamente estos festivales, polos beneficios añadíos que tienen pa los entornos nos que se desenvuelven, especialmente aquellos entamaos en zones rurales o alloñaes. A la RTPA hai que pidí-y que cubra amañosamente tola información y desarrollu de los mesmos, amás de convertise nuna ferramienta de la so promoción. Sicasi, lo primero qu’hai que facer ye felicitar a les persones, asociaciones, colectivos, comisiones, etc. que tán detrás d’estos eventos, porque cola so xera tán faciendo que la música asturiana siga viva y en vivo».
En cuantes a los conteníos, destaquen la crónica titulada «Un añu importante pa la gaita» (resume de l’actividá alredor d’esti instrumentu); los informes «La elegancia de la música asturiana» (sobre les formaciones nueves de la escena folk) y «La mocedá garra puxu na música asturiana» (alredor del relevu xeneracional); el reportaxe «El ‘Soníu Avilés’ na música celta: xénesis y evolución d’una identidá» (centráu nos grupos avilesinos y les sos asemeyances), l’estudiu «El Compañero Paredes trata de organizar un Orfeón Obrero» (repasu históricu a les conexones ente movimientu obreru y les agrupaciones corales asturianes); o les entrevistes a Marisa Valle Roso, Rubén Bada y Héctor Braga, presentando los sos trabayos discográficos nuevos.
Collecha y discu
L’Anuariu zárrase, como siempre, cola sección «Collecha», onde apaecen les producciones musicales y bibliográfiques del 2025. El volume compleméntase con un discu nel que se recueyen muestres de lo meyor qu’ufiertó l’añu, con venti cortes d’estilos como’l folk, el rock, el pop o la canción d’autor, con artistes y grupos como Corquiéu, Felpeyu, Alienda, Los Berrones, Skama la Rede o Ochobre.
