TPA Noticies recoyía esti vienres la xunta n’Uviéu del PEN Asturianu aspirante y la visita del directivu de PEN Internacional, Gabriel Seisdedos.Dempués de meses de trabayu organizativu na puesta en marcha del PEN Asturianu, asociación d’escritores qu’aspira a integrase nel hestóricu PEN Internacional, les xestiones tán bien avanzaes. Nortes
Esti vienres pasáu, la directiva de la organización, encabezada por Berta Piñán, recibió a Gabriel Seisdedos, director del PEN Arxentina y miembru de la dirección de PEN Internacional. L’oxetivu d’esti conceyu, celebráu na Llibrería Trabe d’Uviéu, foi avanzar nos pasos pa la integración como PEN oficial de la entidá, reconocida yá nel últimu congresu de la orgainización internacional, esti mes de setiembre en Cracovia, como Pen «aspirante».
En 2026, y tres siguir los distintos pasos necesarios, el PEN Asturianu sedrá reconocíu como miembru de plenu derechu de la organización que tien alredor de 130 grupos d’escritores, axuntaos por nacionalidaes o llingües según el casu, y alredor de 90.000 miembros nel mundu enteru.
Nel conceyu celebráu esti vienres participaron la presidenta del PEN asturianu aspirante, Berta Piñán, la vicepresidenta Consuelo Vega Díaz, la secretaria Esther Prieto, y el vocal Inaciu Galán. Son tamién directivos del PEN Asturianu, Henrique Facuriella (ayalgueru) y los vocales Sofía Castañón, Marta Mori de Arriba, Xaime Martínez Menéndez y Laura Marcos.
La entidá, fundada xunto a otra docena más d’escritores, prevé abrir inscripciones a otros escritores n’asturianu a lo llargo de los próximos meses y participar de les actividaes del PEN Internacional, asina como abrir víes de trabayu n’Asturies pa la difusión de la lliteratura, la defensa de los derechos humanos y la diversidá llingüística.
PEN International fundóse en Londres, Reinu Xuníu, en 1921, a cencielles como PEN y nel periodu ente guerres, buscando afalar la paz mundial y la llibertá d’espresión. Güei opera en más de 90 países de los cinco continentes, con alredor de 130 centros que sofiten la tresmisión ensin torgues del pensamientu dientro de cada nación y ente toles naciones.
N’España’l PEN esiste de 1921. En 1922 constituyóse’l PEN catalán. Darréu formáronse les sos cañes vasca y gallega. La particularidá de la sección asturiana taría en ser la primera que la so llingua nun ye oficial. Berta Piñán, presidenta de l’asociación asturiana, destaca qu’ente los fines de l’asociación internacional ta la llucha pola reconocencia de tolos derechos llingüísticos, según la llibertá d’espresión y l’igualdá de xéneru.
Nel estáu tán activos nesti momentu un PEN España, recuperáu recién tres un parón de dellos años, el PEN Català PEN Català l’Euskal Pen Kluba. L’asturianu va incorporase asina a un nuevu espaciu d’equiparación col restu de les llingües del estáu.
