Actualidá / Cultura convoca ayudes por 230.000 euros para la normalización del asturianu y del eonaviego. Les subvenciones son en dos llínees, una para medios de comunicación y otra para empreses, fundaciones y asociaciones promotores de proyectos d’interés cultural . El plazu para presentar les solicitúes remata’l 17 de febreru.
La Conseyería de Cultura, Política Llingüística y Deporte llanzó dos llínees de subvenciones para impulsar la normalización social del asturianu y del eonaviego, con una dotación global de 230.000 euros. Dambes convocatories, que se van resolver en réxime de concurrencia competitiva, efuerzan el compromisu del Gobiernu d’Asturies cola promoción y dignificación de les llingües propies del Principáu.
La primer llínea d’ayudes cunta con un presupuestu de 120.000 euros y diríxese a empreses privaes, fundaciones y asociaciones que desenvuelvan proyectos d’interés cultural, llingüísticu o social n’asturianu o eonaviego. D’esta cuantía, 70.000 euros destinaranse a proyectos promovios por empreses y 50.000, a iniciatives d’entidaes ensin ánimu d’arriquecimientu. El resolvimientu de les ayudes puede consultase nel siguiente enllaz del Boletín Oficial del Principáu (Bopa) : miprincipado.asturias.es
Ente los criterios de valoración figuren la corrección llingüística, l’interés cultural y social, la capacidá d’espardimientu, la esperiencia de les persones responsables, la innovación, la perspectiva de xéneru y l’enraigono nel mediu rural.
La segunda convocatoria, dotada con 110.000 euros, ta dirixida a empreses de prensa, radio, televisión o medios dixitales d’ámbitu asturianu. Estos fondos van financiar inversiones destinaes a la producción de conteníos n’asturianu o eonaviego que contribuyan al so usu habitual n’informaciones xenerales, espacios periódicos o programes d’especial interés, siempres dientro de les canales propies del mediu y asumíos editorialmente per este. Van Poder optar a estes ayudes empreses con casa social, establecimientu o delegación n’Asturies. La convocatoria puede consultase nel siguiente enllaz: miprincipado.asturias.es
El plazu de presentación de solicitúes ye de 20 díes hábiles en dambos casos, acabando’l 17 de febreru.
L’Executivu autonómicu afianza la so política de sofitu a la normalización llingüística, fomentando la presencia del asturianu y del eonaviegu nos medios de comunicación y en proyectos culturales, sociales y empresariales que reforcien el so usu social, favorezan la so tresmisión interxeneracional y contribuyan a la so proyección de futuru.
