Nabos que se comen a besos en La Foz: asina foi la particular ceremonia gastronómica de Morcín. Los periodistes Jesús Álvarez y Ana Francisco, Mantequería Arias y l’asociación Torreón Coto de Peñerúes xuren defender y promover el cultivu d’esta hortoliza na fiesta añal entamada pola so Confrería. LNE /semeyes LNE
Per ventiavu añu, la Confrería d’Amigos de los Nabos faía so la ilesia de La Foz de Morcín para celebrar un nuevu Gran Capítulu de la so intensa hestoria. Un actu que sirvió para entronizar como Cofrades d’Honor, como nuevos «comenabos», a los periodistes Jesús Álvarez (TVE) y Ana Francisco (TPA), a la empresa Mantequería Arias, con casi dos sieglos d’hestoria, y a l’Asociación Torreón Coto de Peñerúes.
Un actu qu’empezó con una emocionante alcordanza a los socios finaos, ente ellos José Antonio Martínez Allende («Jama», fundador del colectivu), y a los mineros finaos en Zarréu y Vega de Rengós, y que terminó ente rises por esi xuegu» que da’l nabu a la de falar de la hortoliza.
El desfile de les confreríes qu’acompañaron a la morciniega y la semeya de familia abríen los actos. Sicasí, la soleyera mañana de sábadu yera un escenariu envidiable por que los cofrades llegaos de dellos puntos del país, Francia ya inclusive de Portugal, pudieren compartir pasión pola gastronomía. La periodista y presentadora del programa «El Picu», Ana Francisco, foi una de les entronizadas esti sábadu como Cofrade d’Honor.
Reconocida por munchos vecinos que s’averaben a pidi-y una semeya y parolar con ella, Francisco taba encantada. Aseguró que ser cofrade d’Honor de los Amigos de los Nabos ye especial «porque amás paezme daqué bien amestáu al pueblu, al raigañu, faime muncha ilusión». Lleonesa de nacencia pero yá asturiana d’adopción, en siendo entronizada y besar el nabu, marca de carmín na hortoliza incluyida, la periodista aprovechó pa convidar a los asistentes a apuntase al programa que presenta y tamién a adoptar un galgu, otra de les pasiones poles que se tresvive.
Asina foi’l XX Capítulu de la Confrería d’Amigos de los Nabos en La Foz de Morcín.
Primero que Ana Francisco habíen yá travesáu l’arcu d’onde cuelga’l pimpanu nabu que preside la ceremonia tanto Raquel Pereira, presidenta de l’asociación Torreón Coto de Peñerúes, como Javier Raspia, responsable de mantequería Arias. Pereira eponderó’l trabayu de los Amigos de los Nabos: «unos y otros lo que faemos ye curiar el patrimoniu y entamar actividaes pa de too tipu pa dar a conocer el conceyu de Morcín». Mientres, Javier Raspia tamién estimó a la Confrería que se va alcordar de la mantequería, y destacó los llazos ente empresa y asociación: «a dambos xúnenos la pasión pola gastronomía».
Cerraba la investidura de los cofrades d’Honor Jesús Álvarez. Esti veteranu periodista, voz ya imaxe del deporte en munchos llares al traviés de la televisión, aseguraba que pa él «que s’alcordaren de mi ye un arguyu, y toi encantáu porque estes ceremonies son tradiciones qu’a mi me gusten, soi bien tradicional gústame que se caltengan». Entra amás nuna llista de cofrades honoríficos onde tien dellos amigos: «Ta Sergio Sauca, que foi’l mio compañeru en televisión munchos años; Boris Izaguirre, que tamién ye un bon deportista y díbamos al mesmu ximnasiu, y tamién Vicente del Monte, que ye gran amigu y un fenómenu. Préstame muncho tar nesta llista». Pero Álvarez dexaría lo meyor pal final. Tres una ceremonia llena de dobles sentíos respectu al nabu, ente tamaños, pesos y llargores, Jesús Álvarez dexaba la perlla final: «Antes de venir recibir esta reconocencia del nabu, un amigu díxome que l’añu pasáu nun me lo dieren por centímetros y que esti fuera pelos pelos», lo que desamarró les risaes de tolos asistentes.
La ceremonia del XX Capítulu de la Confrería d’Amigos de los Nabos tamién tuvo otros protagonistes. Primero, los trés alumnos que llograron premios nel concursu rexonal y interregional de «Los Nabos *na cocina». Diego Sierra Díaz (IES Valle d’Ayer) y Silvia Pérez Garnacho (Escuela de Valladolid), lleváronse los dos accésit d’un certame que ganó l’estudiante del Centru Profesional de Xixón, Josu Xabier Díaz. Amás, los Amigos de los Nabos recibieron a un nuevu cofrade numerario, Luciano Menéndez.
La xornada terminaría con una comida d’hermandá, a base, como non, de pote de nabos. Un alcuentru que sirvió pa cerrar un nuevu capítulu nel ampliu llibru de los amigos de los nabos morciniegos, que como cada edición, siguen gasayando a los sos invitaos y poniendo el nabu no más alto de la gastronomía.
