Asina lo señala en declaraciones a NORTES el músicu Héctor Braga, qu’esti viernes presenta nel Aula Cultural Onofre Rojo de Sotrondiu “Nel cantu la memoria”, ensayu sobre l’asturianada col que ganara’l premiu d’ensayu Máximo Fuertes Acevedo nel 2023. El llibru inclúi también la mayor parte del archivu sonoru (496 grabaciones históriques) que l’intérprete llangreanu vien de donar al Muséu del Pueblu d’Asturies de Xixón.
“La especialidá musical docente de Tonada existe dende 2019”
Esti corpus sonoru ta agora disponible nel Archivu del Música Tradicional del muséu. Nél inclúinse grabaciones conservaes en tres continentes, dende Arxentina o Cuba, hasta Marruecos, pasando pel centru asturianu de Xinebra (Suiza).
Braga recopilara toes estes pieces mientres 30 años de investigación musical. Ente elles, figuren archivos d’estudiu y de campu, discos de pizarra y bobines magnétiques. Destaquen pieces como les grabaciones de José González ‘El presi’, na xira que fizo en Cuba en 1940, o tamién la de José Noriega col gaiteru Remis Ovalle, que mientres una xira per América Llatina, diben faciendo grabaciones d’estudiu y despachando los discos pelos centros asturianos que visitaben.
Si bien el volume del “Nel cantu na memoria” ya cuenta con archivos de la mayoría d’estes grabaciones, agora, na páxina web del Archivu de la Música Tradicional axúntase la descripción de la pieza, los datos biográficos del intérprete y la historia del cantar o’l contestu de la grabación.
Braga destaca la importancia histórica y cultural d’estes grabaciones, la mayor parte d’elles (les d’América y les de Marruecos, conservaes en Tánger, por parte d’asturianos exiliaos allá dempués de la Guerra Civil) nunca pisaren Europa, y muncho menos Asturies.
Un corpus sin estudios reglaos
Bon conocedor de la historia de la música asturiana, Braga caltién que tovía güei nun ta valorada, como sí otres expresiones del cantar tradicional, como por exemplu’l flamencu o’l cant d’estil valenciá. La falta d’enseñances artístiques, coles que sí cuenten estes otres disciplines, ye pa esti músicu una de les principales razones.
“Hai currículum y nun s’implantó tovía. Ta esperando a qu’un director de conservatoriu lu aplique, pero ellos tienen les manes ataes, dao que nun se dio la orde dende la Ordenación Académica”, quéxase Braga.
Pa Braga, “los concursos tán mui bien pero la única forma de tirar pola canción tradicional asturiana ye esta”. Recuerda que l’itinerariu educativu ta yá creáu, pero faen falta especialistes que lu impartan.
La falta d’intérpretes de tonada con formación musical ye una cuestión de Braga considera capital pal futuru de l’asturianada, bien dende’l puntu de vista de la creación de nuevos repertorios, o bien de la recuperación de temes que nunca s’usen porque “nun visten” nos concursos. Refierse por exemplu a pieces como La virgen de Covadonga o Soi asturianín, de Cuchichi, incluyíes nel so corpus recopiláu, pero que, según él, nun gocen de l’apreciu debíu porque nos concursos “prímase’l poderíu y la fuerza física” de la voz, anque en munchos casos seya “un don mal alministráu”.
Na so opinión, l’asturianada necesita xente mozo y con formación musical. Recuerda que Rosalía aprendió flamencu na Escuela Superior de Música de Catalunya. “Necesitamos rosalíes de l’asturianada con formación artística”, conclúi Braga.
