La conseyera de Cultura, Política Llingüística y Deporte, Vanessa Gutiérrez, participó güei na defensa de la candidatura d’Uviéu a Capital Europea de la Cultura 2031, nuna presentación que destacó pola diversidá de les persones que faen parte del proyectu.
La conseyera sorrayó que la candidatura cuenta con un apoyu unánime y tresversal, con participación de profesionales del sector cultural, instituciones, colectivos y persones de distintos ámbitos y xeneraciones, lo que demuestra la solidez d’un proyectu pensáu como ferramienta tresformadora pa tol conxuntu d’Asturies.
Amás foi la encargada de zarrar la defensa de la candidatura con una intervención n’asturianu, na que reivindicó la riqueza de contar con una llingua milenaria, mesmo siendo minorizada, como parte fundamental d’un proyectu cultural que tresciende la propia ciudá y se concibe como una fueya de ruta pal futuru cultural d’Asturies.
La candidatura, destacó, representa una apuesta pola cultura, pola participación y polos derechos culturales de la ciudadanía, mostrando al mundu la fortaleza cultural d’Asturies y la so capacidá pa construyir futuru dende la cultura.
Conseyería de Cultura, Política Llingüística y Deporte
L’equipu encargáu de defender el proyectu de Capitalidad Europea de la Cultura 2031 va presentar mañana a les 8:50 nel Ministeriu de Cultura. va facer énte un comité d’espertos internacional formáu por diez persones, dos d’elles españoles.
L’equipu de diez integrantes que va defender mañana a primer hora la candidatura de la ciudá a la Capital Europea ta encabezáu pol alcalde d’Uviéu, Alfredo Canteli, al pie de la Conseyera de Cultura del Principáu, Vanesa Gutiérrez, el director de la candidatura, Rodolfo Sánchez; la directora artística, Natalia Álvarez Simó; la coordinadora territorial, Zoe López; el miembru del comité de la capitalidad, bioquímicu, catedráticu de bioloxía y escritor, Carlos López Otín, el periodista Chus Neira, l’ex viceconseyeru de Cultura del Principáu Jorge Fernández Llión y la periodista y xestora cultural Marta Fernández Silverio. Cierra’l grupu la directora del Institutu Goethe en Madrid, Antonia Blau.
Les intervenciones van facer en dellos idiomes: inglés, español y asturianu. L’equipu movióse güei a Madrid pa defender el proyectu énte’l comité d’espertos que va decidir qué ciudaes superen esti primer corte y siguen nel procesu de selección definitiva. La resultancia final va conocer a finales d’anguaño.
Dempués d’Uviéu, va ser la vez de Palma de Mallorca, la ciudá valenciana de Poties y Toledo, el xueves 12, siguiendo l’orde d’intervención alfabéticu. El vienres 13 va conocese’l nome de les ciudaes que pasen esti primer corte.
