Cuatro actos de la edición d’esti añu acueyen presentaciones, homenaxes y meses redondes onde participen delles personalidaes de la música.
El POEX vuelve demostrar esti añu que la lliteratura y la música asturiana caminen munches vegaes de la mano. Dellos de los actos del programa, anque concebíos dende la poesía, tienen una clara conexón cola escena musical del país, tanto pola presencia de músicos como pola rellación histórica ente versos y cantar n’asturianu.
La poeta Sofía Castañón va presentar Esti amor asturfalante, obra ganadora del Premiu Xuan María Acebal de Poesía, nun actu que va incluyir una llectura como adelantu de la próxima publicación. Va ser en dos feches: el vienres 13 a les 18 hores nel Toma 3 y el martes 17 a les 12 hores na Biblioteca de Roces. La conversación del primer día que va acompañar la presentación corre al cargu de Xaime Martínez, una de les voces más singulares de la creación asturiana contemporánea. Amás de poeta, Castañón ye conocíu pola so faceta audiovisual pola so participación nel espectáculu musical Ser quien a cantar, un proyectu que reflexona dende una mirada feminista la ocupación del espaciu públicu.
Precisamente, Xaime Martínez va tar presente n’otru de los actos entamaos pol POEX. La llectura de Pábilun, del propiu Xaime Martínez, publicáu nuna edición billingüe con traducción al castellanu de Fruela Fernández va ser el motivu. L’actu, que se va celebrar el xueves 19 a les 18 hores nel Toma 3 inclúi una conversación con Nacho Vegas, una de les figures clave de la canción d’autor estatal. A lo llargo de la so trayectoria, Vegas foi incorporando l’asturianu a la so obra musical con cada vez más presencia, sumando una montonera de cantares nesti idioma y reforzando’l diálogu ente poesía contemporánea y canción.
El festival tamién acueye un homenaxe al escritor Xuan Bello, fináu en 2025, tituláu A la solombra d’una zrezal. Nel actu del sábadu 14, a les 12 hores nel salón d’actos del CCAI, va presentase una pieza audiovisual creada pol Atenéu Obreru de Xixón. Bello foi una figura fundamental pa la cultura asturiana contemporánea y la so obra mantuvo siempres una fuerte conexón cola música del país. Dende la recuperación del imaxinariu rural hasta la defensa del idioma, la so lliteratura influyó tamién nel mundu de la música.
A lo último, la mesa redonda pol 20.º aniversariu de la revista Formientu, una publicación fundamental pa entender la evolución de la creación moza n’asturianu nes últimes dos décades, va cuntar tamién con representación del mundu de la música asturiana. Nel alcuentru del domingu 15, a les 12 hores nel Patiu del CCAI, participen quien dirixó la revista a lo llargo d’estos años: Claudia Elena Menéndez, Inaciu Galán y Diego Solís, cola moderación de Marta Mori, y cola incorporación como director nuevu a Raúl Alonso, collaborador d’esti mediu y co-director del Semando Fest y el podcast Héroes ensin nome.
