- SELVA ASTURIANA/ imaxe
- Fonte: La Razón /
La palabra «amagüestu / magosto» provien probablemente del llatín «magus ustus», que significa «gran fueu», n’alusión a la foguera alredor de la cual gárrense les castañes.
Llega’l fríu, tiempu de castañes… sabemos que’l frutu de la castañal foi esencial primero que la pataca fuera introducida dende América. Importante fonte de nutrición para aquellos menos afortunaos, porque mientres dómines d’escasez y hambrunes, cuando apenes podía sobrevivise llográbase gracies a la castaña. Créese que los celtes celebraben xuntes nocherniegues nel monte en redol al fueu, el magnus ustus, el gran fueu, d’ende’l nome de ‘magosto’ o amagüestu.
L’amagüestu ye una de les festividaes más antigües y emblemátiques d’una tierra rica en tradiciones y marcada pola naturaleza, una celebración que tesciende lo gastronómico para convertise nun ritual de comunión colos ciclos de la vida y la muerte, la seronda y la llegada del iviernu.
El so orixe remóntase a dómines prerromanes. Asina, l’amagüestu paez fundir los sos raigaños n’antiguos cultos celtes rellacionaos cola collecha y la celebración del final del ciclu agrícola.
Los pueblos celtes, bien enraigonaos nel noroeste peninsular, celebraben el final de la recueya y l’entamu del tiempu escuru del añu con una serie de rituales, y l’amagüestu bien podría ser una derivación de diches celebraciones n’honor a la bayura de frutos, especialmente la castaña, un alimentu básico nes sociedaes rurales astures.
Los más vieyos, qu’entá recuerden bien estes tradiciones y costumes, dícennos qu’hai que coyer trés castañes al empecipiar la seronda: una pola salú, otra pol dineru y otra pol amor; y guardales a recaldu para tener un bon añu. A la siguiente seronda, han de tirase y sustituyise por otres trés, les más rellucientes y brillantes qu’atopemos…
