Dempués de desembolsar l’ayuntamientu d’A Veiga más de 60.000 euros pa la so compra, el ‘Mazo de Meredo’ entama a recuperar la so imaxe. Operarios municipales remataron los trabayos d’esbroce del entornu, lo que dexa ver los inxenios hidráulicos de la dómina.
La idea ye dir poco a poco reparando los elementos que tán más estropiaos. L’oxetivu final ye qu’esti recursu etnográficu recupere la so imaxe de siempres asegura César Álvarez, alcalde d’A Veiga.
Unos trabayos que se dirán faciendo nos meses vinientes, según tenga presupuestu’l consistoriu. La intención última ye recuperar esti patrimoniu etnográficu y a mediu plazu alcontrar una fórmula afayadiza pa xestionar les sos visites. La conseyería de Mediu Ambiente apurre financiación pa evitar qu’estos entornos desapaezan apunta David Villar, director xeneral de Custodia del Territoriu y Prevención d’Incendiu.
Mientres duren les obres señalizaránse los peligros existentes, como rotura de pasareles o escaleres inestables. El consistoriu avisa que l’accesu ta permitíu baxo la responsabilidá de los visitantes, polo que pide medrar les precauciones a la hora de percorrer el mazu.
