La Vaqueira presenta la so edición 2026 como una esperiencia cicloturista qu’axunta paisaxe, cultura y compromisu social.
La marcha, que se va celebrar el 28 de xunu en L.luarca, refuerza la so propuesta basada nel esfrute del territoriu y una esperiencia completa pal participante. La Voz
La marcha cicloturista La Vaqueira presentó oficialmente la so edición 2026 en Samartín de Lluiña, nun actu nel que se confirmó como una de les propuestes más singulares del calendariu cicloturista del norte. La organización volvió a insistir na so esencia: una esperiencia pensada pa disfrutar del percorríu, del paisaxe y del propiu camín, integrando deporte, cultura y compromisu social nun mesmu eventu. “Queremos que la xente que participe en La Vaqueira s’enamore de la nuesa tierra pa que nos ayuden a cuidala.”
L’encargáu de presentar el percorríu foi Ignacio Arrojo García, quien adelantó dalgunes de les claves de la edición: “Va ser un percorríu tan espectacular como’l del añu pasáu, 9 cotes y dos puertos en La Vaqueira y con dos muros estra pa La Vaqueirona.” Más allá de datos técnicos, el percorríu diseñóse poniendo’l focu en caltener la identidá de La Vaqueira: carreteres poco transitaes, paisaxes máxiques y una conexón constante col entornu. La Vaqueira va ufiertar dos distancies —101 y 118 kilómetros— pensaes p’adaptase a distintos perfiles, con un denominador común: vivir el ciclismu como una esperiencia.
Ente los servicios incluyíos destaquen la merienda escalada’l día 27 en San Roque de Val.louta, avituallamientos personalizaos, serviciu médicu reforzáu y asistencia mecánica, duches, guarda bicis, mini village, comida vaqueira, medaya finisher, fotografía y videu del eventu. Los acompañantes van poder participar na comida vaqueira y disfrutar de la comarca vaqueira. Too ello refuerza la idea de que La Vaqueira nun ye solo una marcha, sinón un eventu pensáu cuidando cada detalle y que pretende xenerar una esperiencia memorable.
Mientres l’actu intervino la historiadora Yedra Riesgo Álvarez: “Recuperar la historia del pueblu llanu y de la xente trabayador, como ye’l casu de los vaqueiros d’alzada, ye un problema, porque cuasi naide nos escribió. Pa valorar y protexer la nuesa identidá y les nueses tradiciones, lo meyor que podemos facer ye siguir tresmitiéndolo y conociéndolo.”
Conciencia social: visibilizar pa prevenir
La presentación tamién punxo l’accentu nel compromisu social del eventu al traviés de la so collaboración con ASACO. “Lo más importante ye que nos quedemos cola idea de que’l cáncer d’ovariu suel presentar unos síntomas mui inespecíficos que se confunden con síntomes dixestivos. Cuando una muyer tien diarrea, estriñimientu, hinchazón abdominal y esos síntomes persisten mientres trés selmanes, ye interesante descartar la posibilidá d’un cáncer d’ovariu con una ecografía.” “A día de güei, lo único que sabemos con seguridá que tien un gran impactu na supervivencia ye que la ciruxía seya realizada por un equipu multidisciplinar especializáu en cáncer xinecolóxicu. ASACO sigue trabayando pa que se designen centros de referencia; mientres tanto, toles persones pueden acudir a nós pa pidir orientación.” La marcha va destinar el 100% de los beneficios del maillot solidariu a esta causa.
La Vaqueira va salir el próximu 28 de xunu de 2026 dende Luarca, anque la esperiencia va entamar el día anterior cola merienda escalada, en Val.louta, celebrando un alcuentru que combina gastronomía, cultura y comunidá.
