- Fonte: El Comercio /
Te proponemos una fin de selmana de senderismu xeolóxicu; combinar l’esfrute de rutes sencielles pola mariña del oriente d’Asturies con un tour nel qu’afayar buelgues y fósiles marinos.
Col fin d’averar estes antigües hestories, según entendeles y conocer el llinguaxe nel que falen los paisaxes, el proyectu asturianu de turismu xeolóxicu Geolag tien entamáu faer un pequeñu gran tour mientres la próxima ponte d’avientu: un tour que pasa por combinar el senderismu pola mariña oriental d’Asturies cola interpretación xeolóxica d’esa zona, cargada de cueves, bufones, sableres y cantiles apinaos de señales, roques kársticas, buelgues y fósiles con decenes d’hestories sorprendentes que cuntar.
Detrás de cada paisaxe escuéndese una gran hestoria. Hai miles d’elles, ende espuestes, y namá fai falta daquién que les amuese p’algamar a acolumbrales. Amás, nun se trata d’hestories cualesquier: son, más bien, relatos fascinantes; tanto, que paecen lleenda o fantasía. Sicasí, son bien reales. Tan antigües qu’asocedieron nada menos que fai 300 millones d’años y siguen ende, en plena naturaleza, disponibles pa quien quiera conoceles. Hestories de dinosaurios, de cueves, de buelgues prendíes na piedra, de roques escarcavonaes que cuspen agua a presión como enormes ballenes, de fósiles marinos y fondos abisales…
Buelgues de dinosaurios na sablera de la Griega, en Colunga.
«Aprovechando esta ponte d’avientu y coles mires de ufiertar una alternativa d’ociu familiar interesante, plantegemos esta fin de selmana xeolóxica pela zona costera oriental d’Asturies. El plan ye tar dos díes esfrutando al campu, afayando llugares increíbles y aprendiendo a interpretar lo que nos cunten los paisaxes al traviés de les roques, los abrigos naturales y los arenales qu’atopamos n’ellos», esplica Luna Adrados, responsable de la área científica de Geolag.
«L’oxetivu d’esta actividá ye combinar senderismo, naturaleza, hestoria y aventura. Pa ello, ponemos a disposición dos díes completos de ruta xeolóxica con posibilidá de pernocta nel albergue de Ribesella y tenemos programaos dos percorríos fascinantes: unu pela zona de Ribesella y Colunga, visitando los rastros de los dinosaurios qu’inda sobreviven nos sos cantiles y sableres. Y otru, a otru día, pola mariña kárstica de Llanes, na que vamos visitar bufonos, sableres y cantiles impresionantes», rellata.
