Nacen diez pastores del osu nun partu clave para salvar la única raza de perru asturiana: «Son increíbles». La variedá canina solo cunta con un centenar d’exemplares y busca la reconocencia oficial. LNE
Diez exemplares de pastor del osu, cinco femes y cinco machos, crecen fuertes y sanos. La camada, frutu de la inseminación artificial practicada a «Lola», fema primeriza avilesina, con espelma de «Brezu», machu de Gozón, supon una importante meyora nos esfuerzos por consolidar una raza qu’entá nun llogró la reconocencia oficial como pura.
Los diez cachorros, que crecen con bona salú gracies a la suplementación alimentaria de la madre, espertaron yá una elevada demanda ente quien siguen los pasos d’esta raza de perru en procesu de recuperación. L’asociación qu’arrexunta a los criadores de pastor del osu, que preside Francisco Soto Ampudia, llogró l’añu pasáu la so clasificación como grupu étnicu, pasu previu a la declaración como raza pura, y trabaya anguaño na escoyeta de material xenético pa establecer comparances con otres races allegaes.
Encruz de perru y osu. El pastor del osu ye una variedá que recibe distintos nomes según la zona, dende los Oscos hasta los Picos d’Europa. La denominación escoyida respuende a criterios mediáticos: «Esistía la lleenda de que yera un encruz d’osu y perru. Había qu’escoyer un nome y el más mediáticu yera ese», esplica’l veterinariu Xabiel González.
Anguaño, envalórase qu’hai abargana d’un centenar d’exemplares, de los cualos unos setenta tán catalogaos. L’oxetivu inmediatu ye comparar l’ADN d’estos perros colos del mastín del Pirinéu, el mastín español o lleonés y el «cao de gado transmontano» de Portugal, una raza, esta postrera, que presenta gran semeyanza morfolóxica y ocupa territorios venceyaos a pastores ástures en dómines romana y prerromana. Nel casu de «Brezu» y «Lola emplegó la inseminación artificial porque la fema, primeriza, refugaba la monta natural.
«Brezu». / LNE
«Posiblemente nun s’entendieron porque a la perra faíalu dañu, y cuando había acoplamientu reculaba», describe. Ye un fenómenu frecuente. La técnica dexó cruciar llínees xenétiques alloñaes, lo que contribúi a amenorgar los problemes de consanguinidá propios de poblaciones amenorgaes. Pero la inseminación nun ye’l métodu que l’asociación pretende enllantar de forma xeneralizada: «Soluciónanos problemes». La principal dificultá pa los cruzamientos programaos anicia en que más del 90% de los exemplares son perros de trabayu que permanecen col ganáu pa defendelo del llobu: «Si saques a un perru dos o trés díes, la cohesión del grupu ruémpese».
Estudios xenéticos
El presidente de l’asociación confía en llograr anguaño’l sofitu de la Dirección Xeneral de Ganadería pa sufragar los estudios xenéticos d’altu resolvimientu que desagüen na reconocencia oficial del pastor del osu como raza pura. Estos analises dexaríen rastrexar l’orixe de la raza y el so posible venceyu con perros de Turquía, bien similares. L’amenaza más grave pa la supervivencia del pastor del osu nun ye numbérica, sinón estructural: «El mayor peligru ye la desapaición del llendo», destaca l’asociación.
