El primer Premio Princesa 2026 en conocese va ser el de les Artes el 29 d’abril.
Los Premios Princesa d’Asturies, qu’anguaño algamen la so cuadraxésima sesta edición, van empezar a fallase’l próximu 29 d’abril, cuando se va dar a conocer el premiáu na categoría de les Artes.
Según avanzó esti vienres la Fundación Princesa d’Asturies, el 6 de mayu fallará’l premiu de Comunicación y Humanidaes; el 13 de mayu, el d’Investigación Científica y Técnica; el 20 de mayu, el de Cooperación Internacional, y el 26 d’ese mesmu mes, el de Ciencies Sociales.
Los fallos van siguir en xunu col de los Deportes, el día 3; el de les Lletres, el 10, y el de la Concordia, el 17.
Una vegada cerráu’l plazu de presentación el pasáu 5 de marzu, la Fundación Princesa d’Asturies recibió anguaño 363 candidatures de 67 nacionalidaes.
Alredor de 160 personalidaes, espertes en caúna de les materies, van integrar los xuraos que van fallar n’Uviéu los ocho premios.
El pasáu añu fueron estremaos el demógrafu estadounidense Douglas Massey (Ciencies Sociales); la fotógrafa mexicana Graciela Iturbide (Artes); l’escritor Eduardo Mendoza (Lletres); el filósofu y ensayista alemán d’orixe surcoreano Byung-Chul Han (Comunicación y Humanidaes); la tenista estadounidense Serena Williams (Deportes); el Muséu Nacional d’Antropoloxía de México (Concordia), la xenetista estadounidense Mary-Claire King (Investigación Científica y Técnica) y l’economista y políticu Mario Draghi (Cooperación Internacional).
L’actu d’entrega de los Premios Princesa d’Asturies celébrase tradicionalmente nel mes d’ochobre nuna solemne ceremonia presidida polos reis, acompañaos pola princesa Leonor y l’infanta Sofía, nel Teatru Campoamor d’Uviéu.
Cada Premiu Princesa d’Asturies ta dotáu cola reproducción d’una escultura de Joan Miró -símbolu representativu del galardón−, un diploma acreditativu, xuna insinia y la cantidá en metálicu de cincuenta mil euros.
