LNE / Los tiburones «Currín» y «Elisa», el «mayor reclamu» del Acuariu de Xixón: tienen más de 20 años, pesen 200 quilos y solo comen los llunes y los vienres. «Tienen unu valumbu brutal y el manexu ye complicáu y peligrosu para ellos y para nós», sostienen nel Bioparc de los dos exemplares toru, que llegaron a les instalaciones asturianes dende la mariña de Florida. Galería semeyes / Instagram Bioparc / https://acuariogijon.es
«Currín» y «Elisa», oficiosamente, son «embaxadores» del Bioparc Acuariu de Xixón. La so capacidá d’atracción ye indiscutible. Y non, nun son seres humanos, sinón dos tiburones toru que faen les delicies d’unos visitantes que queden *obnubilados énte la pimpana presencia d’estos animales que, ensin escaecer el so calter selvaxe, son «seles», destaquen los responsables del Acuariu.
«Elisa», fema, lleva nel Acuariu xixonés venti años. Llegó inclusive antes de la so inauguración, procedente del Acuariu do Grove. Tien unos 30 años… o más. Podría dicise que, nel mundu de los tiburones, ye una vieya». «Yá superó toles mires», bromia Susana Acle, directora de Bioloxía, Veterinaria ya Investigación del Acuariu.
El compañeru de fatigues de «Elisa», «Currín», ronda los 20 años. Nun ye fácil, eso sí, determinar la edá esacta de dambos. Tocantes a dimensiones, miden unos trés metros y pesen unos 200 quilos. «Tienen un valumbu brutal y el manexu ye complicáu y peligrosu pa ellos y pa nós», sostien Susana Acle. Nel treslláu –nel que los animales diben nuna gran cuba– utilizóse una grúa pa introducilos nun tanque que, a lo postrero, convirtiose nel so nuevu llar. Nun cabíen d’otra manera.
«Una vieya» nel mundu de los tiburones
Nel Acuariu, el control d’estos tiburones ye principalmente visual. Los espertos afítense en cómo se mueven, naden o alienden. Magar la so apariencia agresiva, al dir cola boca abierta y amosar les sos files de dientes, namás llueñe de la realidá.
Nel Oceanario conviven con otres especies de tiburones y peces, una raya redonda o dos tortúes bobes. Reina l’harmonía acuática. «Currín» y «Elisa» (provenientes de la mariña de Florida), amás, tienen una peculiaridá. Pa regular el so flotabilidá, pueden tragar aire y almacenalo nel so estómagu. «Y per la parte cimera son bien escuros, ente que pola ventral son más claros; asina se mimeticen na columna de l’agua», amiesta Susana.
Anque pueda sosprender, estos tiburones toru nun precisen comer enforma. Nun son voraces. «Tienen un metabolismu lentu», afirma Acle. La so dieta componse de pieces grandes de merluza, caballa o potarru, que van con suplementos vitamínicos. L’alimentación de «Currín» y «Elisa» ye un acontecimientu nel Acuariu. Realízase llunes y vienres, a les 13.00 hores, y ye abierta a los visitantes, a quien tamién se -yos ufierta una charra divulgativa pa conocer más sobre la especie. Una de les conseñes ta clara: los tiburones nun son peligrosos pa los humanos… magar la percepción que pudo xenerar cierta película de Steven Spielberg.
Esti vienres, los acuaristas Andrés Peláez y Elías Cerviño somorguiarense nel tanque, de siete metros d’altor, p’alimentar a los animales. Ficíerenlo con una piértiga, mientres Elvira Peláez dába-yos indicaciones y tomaba nota de lo que diben comiendo. Pal Bioparc Acuariu cuntar con estos tiburones ye un privilexu. «Son los que más llamen l’atención a la xente; en pocos llugares pueden vese animales tan brutales, emblemáticos ya impresionantes», reivindica Susana Acle.
Los tiburones «Currín» y «Elisa», grandes reclamos del Acuariu de Xixón (n’imaxes) / Marcos Llión
Uz del Riego, responsable d’Educación del Acuariu, encárgase d’ufiertar eses charres. «Los tiburones son unu de los mayores reclamos», resalta del Riego, qu’epondera la importancia d’estes especies pa los océanos y apunta que, en diches charres, «pregúntanos si son peligrosos, si van comese a los buzos o al restu d’animales». Pero non, «Currín» y «Elisa» son pacíficos y nel Acuariu siéntense como en casa, bastante ye que son de los primeros güéspedes del equipamientu.
