Naz Raigañu, grupu d’agrofolk-rock que s’estrena llanzando un EP de dos temes. ‘Llingua de paletos’ y ‘Fala con to güela’ ye la carta de presentación d’esta banda que’l mes qu’entra saca discu y entama a dar conciertos. MUSICASTURIANA.COM
El rock n’asturianu suma una formación nueva a la so escena: Raigañu. Esti grupu presentóse en redes sociales el febreru pasáu y güei estrénense llanzando un EP colos sos dos primeros temes: ‘Llingua de paletos’ y ‘Fala con to güela’. La propuesta musical d’esta banda caleya pente’l folk-rock, el punk y la música tradicional, col protagonismu d’una sección de vientos. Nes lletres rescampla un mensaxe de crítica social y costumismu, too ello enlleno d’ironía y col mundu rural como l’escenariu onde asoceden les histories que cunten.
«Si daqué nos define, ye l’amor pol mundu rural. Eso vese claro nos cancios: ‘Paisanos mal fechos’, ‘Agromoza’, ‘Gaites nel Carrefour’… Interésennos los raigaños, les histories de los pueblos, los oríxenes de los llares y damos munchísima importancia a les costumes y vezos«, desplica Llarvi, vocalista, saxu y flautista de la formación. «Musicalmente movémonos nun tarrén de rock, cuasi punk básicu, pero con una particularidá clara: l’instrumentu principal ye la gaita. Dende’l principiu tuvimos claro que les melodíes teníen que salir de los vientos, y sobre manera de la gaita; por eso tenemos una mezcla bien marcada: una parte rockera, otra folki y otra que podríemos llamar agro, que ye la que mos marca la llínia«, añade’l músicu llavianés d’esti proyectu que s’autoetiqueta como «agrofolk-rock».
Güei estrenen en toles plataformes musicales l’EP Fala con to güela, qu’inclúi’l cantar del mesmu nome -que va ser tamién el títulu del so primer discu-, y ‘Llingua de paletos’. La primer pista Llarvi preséntala como un tema al que-y tienen «un respetu especial». «Tien munchos detalles simbólicos, como los cambios nel estribillu enantes y dempués del fallecimientu de la paisana, o la gaita quedando sola, como si fuera un vieyu funeral celta. Ye un cantar bien emotivu que contrasta col tonu más irónicu d’otros cancios», sorraya. L’otru ye «una crítica social con ironía sobre cómo se menosprecia una de les llingües vives más vieyes de la península«. «Componemos y cantamos cien por cien n’asturianu, y paecíanos importante entamar con esti mensaxe, que marca bien la identidá del grupu», añade.
Orixe, discu y conciertos
L’orixe de raigañu remóntase a payares del añu, anque nun foi hasta febreru d’esti añu cuando completaron una formación que tien componentes que tocaron y/o collaboraron con grupos como Trujas, Stukas, La Mueska, Ilustres Patilludos, Voodoo Grass, Mateo Eraña o la Charanga Élite. Na instrumentación -amás de guitarres, baxu y batería- destaquen los instrumentos de vientu yá mentaos, la trompeta y el trombón.
«Si too va bien, nos próximos díes publicaremos otros dos: ‘Paisanos mal fechos’, cola collaboración de Trujas, y ‘Gaites nel Carrefour’«, desplica’l vocalista de Raigañu. La so intención ye asoleyar el discu completu -que ta producíu por Diego Teksuo – «pal 20 de mayu, con un total de nueve temes«. Llueu aporten los conciertos: 28 de mayu la presentación del álbum na Chalana (Llaviana), 12 de xunu en Blimea, 27 de xunu en Suares (Bimenes) y otres feches que tán zarrando.
Col nacimientu de Raigañu medra la escena de rock n’asturianu gracies a una banda que sigue’l camín de referentes como Los Berrones, Avientu, Spanta la Xente o Skama la Rede y presenta una propuesta a mediu camín ente toos ellos.
