Tania Pereira llanza’l so discu más completu, ‘Rousa de Xericó’. La cantautora de Xedré publica once temes indie-folk, esperimentales y intimistes nos qu’en cinco hai presencia del asturianu. MUSICASTURIANA.COM
Foi cocinándose adulces y la espera pagó la pena. Tania Pereira ta acabante d’asoleyar el so segundu trabayu de llarga duración, Rousa de Xericó, un discu nel que suena la canción d’autor, l’indie-folk y la esperimentación, ensin escaecer los soníos de raigañu. Son once temes -trés d’ellos con lletra n’asturianu occidental y otres dos pieces instrumentales tamién entitulaes nesta llingua-, nos qu’amuesa la so faceta más personal, intimista y esperimental. El 14 d’abril a les 19h va presentalo en directo na Sala Albéniz, dientro de la programación de Música en Rede.
«Ye un discu reflexivu que naz del conceptu detrás de la rosa de xericó, que na so forma seca pue viaxar y vivir milenta años, y namás nuna hora n’agua, tresfórmase y vuelve a la vida, (en pallabres de Marina Abramovic), sintiéndose metafóricamente asemeyada a les xubíes y baxaes que tien el caltener una carrera musical, una rellación o les emociones humanes en xeneral», desplica’l testu de presentación del discu.
Musicalmente siéntense les influencies d’artistes como Bon Iver, Ben Howard o Maestro Espada y nél «guitarres de nylon percusives con afinaciones abiertes entemécense con bases de percusión electrónica minimalista, vientos y samples creando un viaxe cinemáticu». Son «estructures cencielles con voces casi susurraes, qu’aporten como una bocanada d’aire fresco al panorama musical actual», recueye la nota prensa de la que ye la obra más completa de Tania Pereira.
La producción -fecha pol compositor escocés Luke Maher-; la mezcla -desendolcada sobre manera por Brian Hunt-; la instrumentación -mui variada y con unes collaboraciones ente les que destaca la del artista de la escena’l país Andres Rodrigues a la gaita, percusión y sintetizadores; o tola estaya audiovisual -dende les semeyes promocionales hasta los videos creaos p’acompañar a cada plantar en plataformes dixitales-; reflexen por qué esta ye la creación qu’esta artista canguesa trabayó con más ciñu y que supón la so consolidación.
Más de diez años de camín
Tania Pereira entamó la so carrera dende bien xoven. Fía del tamién cantautor Pedru Pereira, tocó con él nel grupu folk Brandal, col qu’editaron un discu, Na fonte la canalina. En 2015 entamó la so carrera en solitario cola publicación del EP Camino lejano, al que siguiríen dellos singles y el so estrenu de llarga duración en 2021, Un sueño dentro de un sueño, con dos temes n’asturianu. En febreru del pasáu añu entamó sacar adelantos d’esti Rousa de Xericó, discu nel que perfecciona la so propuesta tres más de diez años de trayectoria y caltién el so compromisu cola so llingua materna, l’asturianu na so variante occidental. El conciertu del próximu martes na sala Albéniz va ser una oportunidá pa sentir en directo la creación d’esta artista de Xedré.
