- Fonte: LNE / videu TikTok /
- J. Angel Hevia: wiki / semeyes / IG / Youtube /
Hevia torna a los bufones de Pría al cumplise 25 años del so ésitu internacional con «Tierra de naide». El gaiteru retorna a la mariña de Llanes pa rodar una nueva versión del videoclip «Busindre Reel».
Cuando José Ángel Hevia (Villaviciosa, 1967) tenía 16 años, una Vespa y un creciente sentimientu celta, solía garrar la moto, colgar la gaita y tirar a la mariña para tocar nos cantiles. Asina llegó un día a los bufones de Pría. El verde y el gris, «los colores que definen el nuesu paisaxe», resume agora’l músicu, siguíen ayeri pela tarde ellí, pero otres coses camudaren notablemente. «D’aquella equí nun había naide, o un paisanu segando pación pa les vaques, si había y güei, y afítate que ye ochobre, hai una romería turística». El gaiteru ye’l mesmu, pero un pocu más vieyu. Dientro d’unos díes cumple 57 y si güei vuelve equí a tocar otra vegada’l «Busindre Reel» que-y dio fama internacional en 1999 y a volver grabar ese mesmu videoclip nesos mesmos riscos ye porque se cumplen 25 años d’aquel ésitu entós impensable y güei imposible. Foi l’añu que-y dieron el «Platinum Europe Award» por vender más d’un millón de discos de «Tierra de naide» n’Europa.
Güei, nun momentu en que naide viende un millón de discos, Hevia quixo volver llanzar el cantar, que va acompañar una edición especial del discu porque en tou esti tiempu nun se revisó nin actualizó nada d’aquel trabayu. El discu va incluyir les versiones qu’Hevia y la so banda faen agora en directu, como más arreglos interpretaos polos músicos y menos samplers, esplica. Otros ingredientes nun camudaron. Volverá sonar la voz de Mari Lluz Cristóbal Caunedo como lo fixo esti branu en Xixón y les gaites de Candás. Les que-y acompañaron esti sábadu fueron les de Llacín, de Llanes.
