- Flor Del Agua/ Semeya
- Fonte: El País / Luis Laria /
Un calamar xigante, varáu n’una sablera de Llanes. Esta especie, altamente tóxica para’l ser humanu y con escasa presencia en tol mundu, puede algamar los 17 metros y llegar a pesar 312 quilos.
Un calamar xigante foi alcontráu varáu na vera de la sablera del Sablón, en Llanes (Asturies). El so nome científicu ye Architeuthis Dux y trátase d’un afayu inusual, yá que según esplica Luis Laria, presidente de la Coordinadora para l’Estudiu y Protección de les Especies Marines (Cepesma), “esta especie tien escasa presencia en tol mundu. Eso sí, d’atopase, ye más probable que sía nel Cantábricu y en Nueva Zelanda”.
El Cepesma solo caltien 21 exemplares d’esta especie y una de les sos característiques más reseñables, según detalla Laria, ye’l considerable tamañu que puede algamar: dende los seis a los 17 metros. “Esti xéneru presenta un dimorfismu sexual pronunciáu. El pesu máximu envalórase en 312 kilogramos les femes y en 178 en machos”, indica l’espertu, para añedir que “los machos tienen una vida más curtia que les femes y maurecen sexualmente más tempranamente”. Asina, envalórase que los machos viven en redol a un añu y les femes dóblen-yos o tripliquen los años.
Esta especie de calamar nun puede consumise pos “ye altamente tóxicu para’l ser humanu”, yá que tien un porcentaxe eleváu d’amoniacu na masa muscular. “Nós na entidá caltuvimos tolos calamares qu’apaecieron mientres los postreros 25 años”, añede Laria. Nesta ocasión, l’exemplar foi recoyíu pola Guardería del Mediu Natural del Principáu y, más palantre, va decidise si va ser vencíu al Cepesma.
